Euskal Herriko Agintaritzaren Aldizkaria

9. zk., 2013ko urtarrilaren 14a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INGURUMEN ETA LURRALDE ANTOLAMENDU SAILA

252

EBAZPENA, 2008ko apirilaren 30ekoa, Ingurumeneko sailburuordearena, Cespa Conten, S.A. enpresari ingurumeneko baimen bateratua ematen diona, Larrabetzuko udalerrian duen hondakin egonkortu eta solidotuen (geldoaraziak) zabortegirako.

AURREKARIAK

2006ko abenduaren 29an, Roberto Manterola Zárate jaunak, Cespa Conten, S.A. enpresaren izenean eta berau ordezkatuz, Eusko Jaurlaritzako Lurralde Antolamendu eta Ingurumen Sailari ingurumeneko baimen bateratua ematea eskatu zion, Kutsaduraren Prebentzio eta Kontrol Integratuari buruzko uztailaren 1eko 16/2002 Legeak xedatutakoaren arabera, Larrabetzuko (Bizkaia) udalerrian hondakin egonkortu eta solidotuen zabortegirako. Eskaerarekin batera, proiektuak Larrabetzuko hirigintza-plangintzarekin duen bateragarritasunari buruzko 2006ko azaroaren 3ko udal-txostena bidali du sustatzaileak, ondorengo agiri teknikoekin batera:

– Proiektu teknikoa. Hondakin geldoarazien gordetegi kontrolatua Larrabetzun (Bizkaia) (2006ko abendua).

– Laburpen ez-teknikoa. Hondakin geldoarazien gordetegi kontrolatua Larrabetzun (Bizkaia) (2006ko abendua).

Erreferentziako baimenaren eskabidearen unean, Cespa Conten, S.A. enpresak, besteak beste, Jarduera Baimena, 1991ko maiatzaren 22koa, eta Irekitze Baimena, 1993ko otsailaren 17koa, zituen. Aipatu baimen horiek zabortegiaren erregularizaziorako eman ziren, enpresa sustatzaileak zegozkion baimen hauek zituen: hondakin ez-arriskutsuen kudeatzaile izateko baimena (hondakin geldo eta geldoarazien zabortegia instalatzeko baimena), 1997ko apirilaren 8koa, hondakin-urak (lixibiatua) Atxispe errekara (Butroi ibaiaren arroa) isurtzeko behin-behineko Baimena, 1997ko irailaren 30ekoa (Uren Zuzendariaren 2004ko uztailaren 11ko Ebazpenak aldatua) eta hondakin arriskutsuen ekoizle txikien erregistroan izena emana, 2001eko maiatzaren 14an, hondakin ez-arriskutsuen, hondakin arriskutsuen eta ur-isurketen kudeatzaileen arloan indarrean zegoen legediarekin bat eginez.

2007ko urtarrilaren 25ean, Ingurumenaren Kalitatearen Zuzendaritzak prozeduran parte hartzen duten hainbat organori txostenak eskatu zizkion, ingurumen organoak proiektua jendaurrean jartzeko agindu zezan. Zehazki, Larrabetzuko Udalari eta Eusko Jaurlaritzako Osasun Sailari egin zitzaien kontsulta.

2007ko otsailaren 27an eta ekainaren 26an, ingurumen organoak agiri osagarriak txertatzeko eskatu zion sustatzaileari, eta espedientea 2007ko azaroaren 9an osatu zen.

Aurkeztutako agiriak nahikoa zirela egiaztatu ondoren, Ingurumen sailburuordeak 2007ko azaroaren 14an emandako ebazpenaren bidez, jendaurrean jarri zen 30 egun balioduneko epean, Cespa Conten, S.A. enpresak sustatutako proiektua, egoki iritzitako alegazioak aurkezteko. Euskal Herriko Agintaritzaren Aldizkarian nahiz Bizkaiko Aldizkari Ofizialean argitaratu zen, bietan 2007ko abenduaren 3an. Era berean, Euskal Autonomia Erkidegoko bi egunkaritan argitaratu zen 2007ko abenduaren 2an, eta proiektuak hartuko duen eremuaren ondoko auzokide bakoitzari jakinarazpena bidali zitzaion.

Jendaurrean jartzeko izapidetze-epea bete ondoren, alegazio-idazkirik aurkeztu ez zela egiaztatu da.

Uztailaren 1eko 16/2002 Legearen 17. eta 18. artikuluetan xedatutakoa betez, 2007ko urtarrilaren 14an Ingurumenaren Kalitatearen Zuzendaritzak txostenak eskatu zizkien Larrabetzuko Udalari eta Eusko Jaurlaritzako Osasun Sailari, espedientean ageri den emaitza jasoz.

2008ko apirilaren 17an, Kutsaduraren Prebentzio eta Kontrol Integratuari buruzko uztailaren 1eko 16/2002 Legearen 20. artikuluan xedatutakoa betez, espediente osoa Cespa Conten, S.A. enpresaren esku utzi zen, Ingurumen eta Lurralde Antolamendu Sailak egindako ebazpen proposamena gehituz.

ZUZENBIDEKO OINARRIAK

Uztailaren 1eko 16/2002 Legearen 1. artikuluan xedatutakoaren arabera, lege horren xedea da atmosferaren, uraren eta lurzoruaren kutsadura saihestea edo, hori ezinezkoa denean, kutsadura hori gutxitu eta kontrolatzea; eta hori lortzeko, ingurumen osoaren babes-maila altua helburutzat harturik, kutsadura prebenitu eta kontrolatzeko sistema integratu bat ezartzea.

Kutsaduraren Prebentzio eta Kontrol Integratuari buruzko uztailaren 1eko 16/2002 Legea garatu eta burutzeko Erregelamendua onartzen duen apirilaren 20ko 509/2007 Errege Dekretuaren 3. artikuluan xedatutakoarekin bat eginez, baimen honetan sartzen dira ekoizpen-elementu eta -lerro guztiak; 16/2002 Legearen 1. eranskinean aipatzen ez diren arren, lege hori aplikatu beharreko esparruko jardueren instalazioetan gauzatzen dira eta jarduera horrekin zerikusia dute.

16/2002 Legearen 9. artikuluak ezartzen duena betez, ingurumeneko baimen bateratua behar dute 1. eranskinean aipatzen diren jardueraren bat garatzen duten instalazioak eraiki, muntatu, ustiatu, lekuz aldatu nahiz funtsezko beste aldaketaren bat egiteko. 11. artikuluaren arabera, baimen honen oinarrizko helburua baldintzak ezartzea da, araua, berau aplika daitekeen instalazio guztietan betetzen dela bermatzeko; horretarako, baimena emateko parte hartuko duten Herri Administrazio desberdinen artean koordinatuta izango den prozedura bat erabili nahi da, izapideak erraztu eta partikularrek ordaindu beharreko kargak gutxitzearren. Era berean, indarrean dagoen araudian aurreikusiriko ingurumeneko baimen guztiak egintza administratibo bakar batean bildu nahi dira. Cespa Conten, S.A. enpresaren kasuan, baimen hauek guztiak behar ditu: hondakin geldoaraziak kudeatzekoa zabortegian utziz hondakinak ezabatzearen bidez, hondakin arriskutsuak sortzearen, Atxispe (Butroi ibaiaren arroa) errekara isurketarena eta, ingurumen-izaerako beste zehaztapenen artean, atmosferaren kutsadurari dagozkion baimenak eta lurzoruaren kutsadura prebenitu eta zuzentzeari dagozkionak. Gainera, espedientean beste administrazio eta erakunde eskudun batzuek ere parte hartu dutela adierazi behar da, aginduzko txostenak igorriz.

16/2002 Legearen 29. artikuluan xedatutakoaren arabera, ingurumeneko baimen bateratua emateko prozedurak jarduera sailkatuetarako udal-lizentziaren prozedura ordezkatzen du, jarduera gogaikarri, osasungaitz, kaltegarri eta arriskutsuei buruzko azaroaren 30eko 2414/1961 Dekretuan aurreikusten zena; ez du ordezkatzen, ordea, udal-agintaritzak emango duen behin betiko ebazpena. Ondorio horietarako, ingurumeneko baimen bateratua udal-agintarientzat loteslea izango da, baldin eta lizentzia ukatzeko bada edota neurri zuzentzaileak ezartzeko bada; baita aipatu arauaren 22. artikuluan jasotako ingurumen-alderdiei buruzko aipamena egiten bada ere. 29. artikulu horretan aipatzen denez, goiko guztiak ez ditu kaltetuko autonomia-erkidego bakoitzean jarduera sailkatuei aplikatzekoak diren gainerako arauak. Transkribatutako aginduak aplikatuz, Cespa Conten, S.A. enpresari dagokion ingurumeneko baimen bateratuaren prozedurak barne hartu ditu Euskal Herriko Ingurumena Babesteko otsailaren 27ko 3/1998 Lege Orokorrean aurreikusitako izapideak; horiez gain, espedientean sartu dira Larrabetzuko Udalaren eta Eusko Jaurlaritzako Osasun Sailaren txostenak.

Azkenik, instalazioak gehienez isur ditzakeen gai kutsagarrien balioak eta ingurumena, oro har, ahalik eta gehien babesteko ustiapenerako ezarriko zaizkion beste baldintza batzuk zehazte aldera, Ebazpen hau egiterakoan kontuan izan dira teknika onenen erabilera eta hondakinak zabortegian utziz hondakinen ezabatzea arautzen duen abenduaren 27ko 1481/2001 Errege Dekretuak ezarritako neurriak eta baldintzak. Gainera, sektoreko araudiei dagokienez, kasu honetan bereziki aplikatzekoa da hondakinei buruzko apirilaren 21eko 10/1998 Legea.

Espedienteko txostenak aztertu ondoren, ebazpen proposamena sinatu eta Cespa Conten, S.A. enpresak sustatutako proiektuak bete beharreko baldintzak ezarri ziren.

Goian adierazitako izapideak amaitu dira, Kutsaduraren Prebentzio eta Kontrol Integratuari buruzko uztailaren 1eko 16/2002 Legearen 20. artikuluan jasotzen den entzunaldi-izapidea bete da, eta organo hau da ingurumeneko baimen bateratu hau emateko eskuduna, aipatutako araudiaren 13. artikuluan eta Ingurumen eta Lurralde Antolamendu Saileko egitura organikoa ezartzen duen urriaren 25eko 340/2005 Dekretuaren 9. artikuluan ezarritakoaren arabera.

Ondorengo araudia ikusi da: Ingurumen eta Lurralde Antolamendu Sailak 2008ko apirilaren 16an emandako ebazpen proposamena; otsailaren 27ko 3/1998 Lege Orokorra, Euskal Herriko Ingurumena Babesteari buruzkoa; 16/2002 Legea, uztailaren 1ekoa, Kutsaduraren Prebentzio eta Kontrol Integratuari buruzkoa; Ingurumenaren gaineko Eraginaren Ebaluazioari buruzko ekainaren 28ko 1302/1986 Legegintzako Errege Dekretua, maiatzaren 8ko 6/2001 Legeak aldatu zuena; irailaren 30eko 1131/1988 Errege Dekretua, Legea burutzeko araudia onartzen duena; urriaren 25eko 340/2005 Dekretua, Ingurumen eta Lurralde Antolamendu Sailaren egitura organikoa ezartzen duena; 30/1992 Legea, Herri Administrazioen Araubide Juridikoa eta Administrazio Prozedura Erkideari buruzkoa, eta aplika daitekeen gainerako araudia,

EBAZTEN DUT:

Lehenengoa.– Bilbao (Bizkaia) udalerriko Henao kaleko 20. zenbakian egoitza soziala duen eta IFK: A-48060057 zenbakia duen Cespa Conten, S.A. enpresari Ingurumeneko Baimen Bateratua ematea, Larrabetzu udalerrian (Gipuzkoa) hondakin egonkortu eta solidotuen zabortegirako, Ebazpen honen Bigarren atalean zehaztutako baldintzak jarraituz.

Jarduera, Kutsaduraren Prebentzio eta Kontrol Integratuari buruzko uztailaren 1eko 16/2002 Legearen 1. eranskineko 5.4 kategorian sartuta dago: «Hondakin mota guztiak dituzten zabortegiak, eguneko 10 tona baino gehiago jasotzen dituztenak edo 25.000 tona baino gehiagoko guztizko gaitasuna dutenak, hondakin geldoen zabortegiak alde batera utzita».

Cespa Conten, S.A. enpresak Larrabetzuko (Bizkaia) udalerrian sustatutako jarduera hondakin egonkortu eta solidotuen zabortegiaren ustiatzean oinarritzen da.

Biltegiratze kontrolatua Larrabetzuko (Bizkaia) udalerrian kokatzen da eta zabortegiaren gutxi gorabeherako UTM koordenatuak honakoak dira:

– X = 519.000.

– Y = 4.792.500.

Zabortegiko ontziaren ezaugarri nagusienak honakoak dira: bi andel desberdindu ditu utzitako hondakinen tipologiaren arabera: bata, hondakin ez-arriskutsuei zuzendua (jada itxia), eta bestea, hondakin egonkortu eta solidotuentzat.

2005eko urrian hondakin ez-arriskutsuak jasotzeari utzi zitzaion ontzia beteta zegoelako, nahiz eta 2006ko martxora arteko gainerako hilabeteetan zuntz-zementua botatzen jarraitu zuten. Martxoan behin betikoz amaitu zen hondakin horien sarrera.

Guztira hartzen duen azalera 366.600 m²-koa da eta egonkortu eta solidotuen gelaxkarako aurreikusitako azalera guztira 5,3 ha-koa da.

Isuri-ontziaren ahalmen erabilgarria, gutxi gorabehera, 974.406 Tn-koa izango da, eta bere bizitza baliagarria 10,2 urte ingurukoa da.

Egonkortu eta solidotuen gelaxka edo ontzia, 4 fasez osatua dago eta horiek beste azpi-fase batzuetan banatzen dira: 1. fasea, 1. fasea (4 azpi-fase), 3. fasea (3 azpi-fase) eta 4. fasea (2 azpi-fase).

Iragazgaiztasun-sistema honakoek osatzen dute: PPko geozuntza (1000 g/m²), 2 mm-ko lodierako HDPE geomintza eta sastatzearen aurkako PPko beste geozuntz bat (1000 g/m²). Horrek, lursailak eskainitako iragazgaizte naturalarekin batera (10-6-10-7 m/s-ko iragazkortasuna, 10-9 m/s baino gutxiagoko iragazkortasuna bermatzen du.

Zabortegira iristen diren hondakinak sarrera- eta pisu-kontrolak pasatzen dituzte. Bertan, kargaren ikus-kontrola eta agirien kontrola egiten da.

Ustiapen-metodoa kamioia irauliz isurketa egin eta ondoren, banatu, hedatu eta konpresioan oinarritzen da. Hondakin-geruzen eta erdiko estaldura-geruzen isurketa egiten da. Deskarga nasa batetatik egiten da eta ondoren, hondakina zabaldu egiten da geruza desberdinetan ustiapen-fasearen arabera. Azkenik, eta sortutako hondakinen kopurua gutxitze aldera, hondakinak aldi baterako estaltzen dira (ustiapen irekiko eremua, estali gabe, 1.000 m²-koa da).

Drainatzea, geozuntzaren gainean jartzen den legarrezko (20/40 mm) 0,5 m-ko lodierako geruza batez osatzen da.

Lixibiatuak jaso eta lixibiatuak biltegiratzeko 2 zulotara eramaten dira: bata, 2.000 m³.–koa da eta itxita dagoen ez-arriskutsuen gelaxka zaharretik datozen lixibiatuak jasotzen ditu eta bestea, 1.000 m³-koa da eta egonkortu eta solidotuen gelaxkaren lixibiatuak jasotzen ditu. Ondoren, lixibiatua, lixibiatuak tratatzeko instalaziora eraman eta han tratatzen da.

Lixibiatuen tratamendu-instalazioak honako osagaiak ditu:

– Tratamendu fisiko-kimikoko instalazioa, egonkortu eta solidotuen gelaxkako lixibiatuak tratatzeko, tratamendu biologikoa egin aurretik.

– Prozesu biologikoa nitrifikazio-desnitrifikazioarekin.

Ura, tratatu ostean, Atxispe errekara (Butroi ibaiaren arroa) isurtzen da.

Ez-arriskutsuen zabortegi-gasen isurtzea kaptatu eta tratatzeko sistemak, biogasa eta kondukzioak ebakuatzeko tximinien bidezko gasak kaptatzeko sarea du. Horiek biogasa erregulatzeko 2 estaziotara konektatuta daude. Estazio horietan erre aurretik sortutako gasaren aberastasuna kontrolatzen da. Errekuntza hori xurgatze- eta erretze-zentralean egiten da eta honako osagaiak ditu: xurgatzailea (biogas-erregailua hornitzen duena), gas-kondentsadorea (hezetasuna ezabatzen duena) eta zuzia.

Gurpilak garbitzean geratzen diren hondakin-urak lixibiatuen drainatze-sistemara daude konektatuta eta biltegiaren ustiapenean sortzen diren gainerako lixibiatuekin kudeatzen dira.

Instalazioan, sortzen diren hondakin nagusiak zabortegiaren beraren lixibiatuak tratatzeko instalazioan sortutako lohiak dira.

Proiektuan aurreikusitako prozesuek teknika erabilgarri onenak osatzen edo barruan hartzen dituzte. Honela, osotasunean ingurumena babesteko helburuak betetzen dituzte, kutsaduraren prebentzio eta kontrol integratuari buruz indarrean den araudian adierazitakoari jarraituz.

Bigarrena.– Cespa Conten, S.A. enpresak Larrabetzuko udalerrian sustatutako hondakin egonkortu eta solidotuen zabortegia ustiatzeko ondorengo baldintzak eta eskakizunak ezartzea.

A) Erantzukizun zibileko aseguru bat eratu beharko da milioi bat (1.000.000) euroko zenbatekoaz, ondorengoak estaliko dituena: hirugarren pertsonei edo horien ondasunei sortutako balizko kalteengatiko kalte-ordainak, eta baimen honek onartutako jardueraren ondorioz ingurumen aldatua konpondu eta berreskuratzeko kostuak.

Cespa Conten, S.A. enpresak kontratatutako aseguruaren baldintza orokorren, partikularren eta bereizien kopia bidali beharko dio ingurumen organoari, ingurumen organoak onar dezan.

Erantzukizun zibileko aseguruaren eguneratzea egiaztatzen duen agiria urtero bidali beharko zaio ingurumen organoari. Polizan aldaketarik izanez gero, ingurumen organoari jakinarazi beharko zaio; halaber, kontratatutako aseguru berriaren baldintza orokorren, partikularren eta bereizien kopia igorri beharko zaio.

B) Fidantza-prestazioa milioi bat zazpiehun eta laurogei mila zortziehun (1.780.800) euroko zenbatekoaz, azaroaren 2ko 423/1994 Dekretuaren, hondakin geldo eta geldoarazien kudeaketari buruzkoaren 9. artikuluan ezarritako baldintzetan. Fidantza horren zenbatekoa hondakinak tratatzeko gehienezko ahalmenaren arabera zehazten da.

Sustatzaileak fidantza horren murrizketa bat eskatu ahal izango du, zabortegia ustiatzeko planean oinarrituta, zabortegiko ontzia, betetzea eta azken zigilatzearen iragazgaiztea (aldi baterakoa edo behin betikoa) eraikitzeko faseak zehaztuz. Fidantza horren gutxieneko zenbatekoak bat etorri beharko du ustiapen-planean aurreikusitako zigilatze-azalera handienaren (horren benetako tamainan neurtuta, ez proiekzio horizontalean) kontratako burutze-kostuarekin, eta itxi ondorengo mantentze-lanen kostuarekin 30 urtean zehar.

Fidantza horren zenbatekoa urtean behin eguneratu ahal izango da; aurreko 12 hilabeteetako kontsumorako prezioen indizearen (KPI) arabera areagotu edo egindako gastuaren arabera murriztu ahal izango da.

C) Sustatzaileak finantzen azterketa eguneratua aurkeztu beharko du eta bertan, instalazioa ezarri eta ustiatzeko kostuak, A puntuan (erantzukizun zibileko asegurua) ezarritako bermeetatik eratorritako gastuak, 30 urteko epearen ondorengo itxiera eta mantentze-lanen zenbatetsitako kostuak eta neurri babesle eta zuzentzaileak eta ingurumena zaintzeko programa betearazteari buruz baimen honetan ezarritako eskakizun guztiak.

Finantzen azterketa horretan, gastuak eta diru-sarrerak partidaka eta urteka xehatuta egon beharko dira, aurreikusitako ustiapen-planarekiko koherentzian.

D) Administrazioarekiko harremanez arduratuko den pertsonaren gainean Ingurumen Sailburuordetzari eman dizkion datuetan aldaketarik balego, Cespa Conten, S.A. enpresak aldaketa horien berri emango du.

E) Neurri babesle eta zuzentzaileak, sustatzaileak Ingurumen Sailburuordetza honetan aurkeztu dituen agirietan aurreikusi bezala burutuko dira, indarrean dagoen araudiaren arabera eta ondorengo ataletan ezarritakoari jarraituz:

E.1.– Baldintza orokorrak lanak egiten diren bitartean.

E.1.1.– Jarduketa-esparrua mugatzea.

Obrak nola lurzoruaren okupazioa ekartzen duten eragiketa osagarriak proiektuaren mugen barruan garatuko dira. Makinek eta ibilgailuek muga horietatik kanpo zirkulatzea ahalik eta gehien murriztuko da.

Esparru horretatik kanpo ustekabeko eraginak sortuz gero, zuzentzeko eta leheneratzeko neurri egokiak aplikatuko dira, aurrez Ebazpen honen E.1.9 atalean adierazitako ingurumen-aholkularitzaren txostena eginda.

Obrarako sarbideak, makina-parkea, obraren materialak aldi baterako gordetzeko gunea, hondeaketa-lurren eta hondakinen aldi baterako metaketak ingurumenean ahalik eta eragin txikiena izateko moduan jaurtiko dira. Obrak hasi aurretik, aurreko alderdiak xehetasunez adierazten dituen mugaketa egingo da kartografian. Mugatze hori Obra Zuzendaritzak onartu beharko du, aurrez Ebazpen honetako E.1.9 atalean aipatutako ingurumen-aholkularitzaren txostena eginda.

E.1.2.– Ondare naturala babesteko neurriak.

Zuzeneko okupaziorik aurreikusten ez den guneetan bertako landaredia sasiz garbitzea saihestu beharko da. Horretarako, mantendu eta zaindu beharreko landarediaren eremua zehatz mugatu eta balizatu beharko da.

Hala badagokio, kolektorera doazen lixibiatuen hustubideen hodien eragina jasotzen duten ubideen gurutzatzeak, instalazio horietako babes-egiturek, erasandako ibilguaren tarteen funtzionaltasuna berreskuratzean ez eragiteko moduan egin beharko dira eta dagoen landaredia ahalik eta gehien errespetatuz.

Behin hodiak ezarrita eta zangak itxita, ibaiaren ohantzearen bihurketari ekingo zaio, ohantzetik bertatik eratorritako materiala erabiliz eta berezko egitura errespetatuz. Halaber, aldatutako azaleretako landaredia berrituko da, erasandako bazterren berezko egitura ahalik eta gehien errespetatuz.

Proiektuak erasandako ubideen bide-zorren eremua aldi baterako edo modu iraunkorrean okupatzea saihestuko da; ahalik eta baldintza naturalenetan geratu beharko da, betegarririk, itxiturarik eta bere funtzioa eragotziko duten bestelako okupaziorik gabe.

E.1.3.– Lurzorua eta ura babesteko neurriak.

Obraren makina-parkearentzat bereizitako azalera eta haren mantentze-eremua drainatze naturaleko saretik isolatuko da. Zola iragazgaitza eta efluenteak biltzeko sistema bat izango ditu, lurzorua eta ura olio eta erregaiekin ez kutsatzeko. Erregaien zamalanak, olio aldaketak eta tailerreko jarduerak ez dira baimenduko adierazitako guneetatik kanpo.

Eraikuntza-fasea, jalkin xeheen isurtzea drainatze-sarera minimizatuz egin beharko da. Horretarako, ura bideratzeko tresnak eta solido esekiei eusteko sistemak proiektatu eta egingo dira, horietan obren ondoriozko ur kutsatua biltzeko.

E.1.4.– Hauts-isurtzeak gutxitzeko neurriak.

Obrak dirauen artean, bideak eta ibilgailuak igarotzeko beste lekuak garbitzeko kontrol zorrotza burutuko da, bai obrek erasandako ingurunean, bai horietarako sarbideetan. Pistak eta aldi baterako soil egongo diren eremuak ureztatzeko sistema bat egongo da.

Obra-guneetako irteeran ibilgailuak garbitzeko instalazioak izango dira. Instalazio horien ezaugarriak eta kokaleku zehatza Ebazpen honen E.1.10 puntuak aipatzen duen agirian jaso beharko dira.

E.1.5.– Zarata eta dardaren eraginak gutxitzeko neurriak.

Eraikitze-fasean barrena, proiektuan eta Ebazpen honetan deskribatutako neurriak ezarri beharko dira, makinek bete beharreko baldintzak, haien mantentze-lanak, eta lan ordutegiak zehaztuko dituena.

E.1.6.– Hondakinak kudeatzeko neurriak.

Obretan sortutako hondakinak, hondeaketakoak, ebakiak, bilgarriak, erreuseko lehengaiak eta garbiketa-kanpainakoak prestatzeko eragiketetan sortutakoak barne, hondakinen apirilaren 21eko 10/1998 Legean eta aplikatzekoak diren berariazko araudietan aurreikusitakoaren arabera kudeatuko dira.

Obran sortutako hondakin guztiak, horien baliotzea teknikoki eta ekonomikoki bideragarria bada, hondakin-baliotzaile baimendu bati igorri beharko zaizkio. Hondakinak ezabatu ahal izango dira, baldin eta horiek baliotzea teknika, ekonomia edota ingurumen aldetik bideragarria ez dela behar bezala egiaztatzen bada.

Zabortegira bideratu behar diren berrerabili edo baliotu gabeko materialak, zabortegietan hondakinak onartzeko irizpide eta prozeduren arabera kudeatu behar dira.

Lurrak betetzeko edo egokitzeko hondakinak hondakin geldo eta geldoarazien kudeaketari buruzko azaroaren 2ko 423/1994 Dekretuaren arabera kudeatuko dira.

Hondeaketaren soberakin-gordailuaren betegarria eraiki nahi izanez gero, azaroaren 2ko 423/1994 Dekretuan ezarritakoa betez, dagokion betetze-proiektua idatzi beharko da, eta horren edukia hondakin geldo edo geldotuen zabortegi-instalazioen, betelanen edo lurra egokitzeko lanen proiektu tekniko edo txosten deskriptiboen edukiari buruzko Lurralde Antolamendu, Etxebizitza eta Ingurumen sailburuaren 1995eko otsailaren 15eko Aginduan zehaztutakora egokituko da. Proiektua ingurumen organo honi aurkeztu beharko zaio, betearazi aurretik baimena eman dezan.

Olio erabilien kudeaketa Euskal Autonomia Erkidegoko (EAE) olio erabiliaren kudeaketa arautzen duen irailaren 29ko 259/1998 Dekretuaren eta industrian erabilitako olioaren kudeaketa arautzen duen ekainaren 2ko 679/2006 Errege Dekretuaren arabera gauzatuko da.

Olio erabiliak kubeta edo segurtasun-sistema barruko gordailuetan gordeko dira aldi baterako, kudeatzaile baimenduak jaso arte, gordailu nagusia hausteagatik edo estankotasuna galtzeagatik olioak sakabanatzea saihesteko. Horretarako, kontratistak berak dituenak edo Cespa G.R., S.A. enpresak Mutiloako zabortegiko instalazioetan dituenak erabiliko dira.

Hondakinak kudeatzeko araudia betetzea errazteko, lan guztietan sortutako hondakinak kudeatzeko sistemak jarri beharko dira. Sistema horiek lan horien arduradunek kudeatuko dituzte, horiek izango baitira langileek sistemak zuzen erabiltzearen arduradunak. Bereziki, erregai eta produktuak gordetzearen, makinen mantentze-lanak egitearen edo hondakinak erretzearen ondorioz ez dira inolaz ere efluente kontrolatu gabeak sortuko.

Aurrekoaren haritik, berariazko gune bat egokituko da olio-latak, iragazkiak, olioak, pinturak, etab. bezalako hondakin arriskutsuak gordetzeko instalazio estaliak jartzeko, eta horietatik bereiz, hondakin ez-arriskutsu eta geldoetarako berariazko edukiontziak jarriko dira. Edukiontzi horiek itxita egongo dira kudeatzaileari entregatu arte, edukia lurrunketagatik edo isurtzeagatik galtzea saihesteko.

Era berean, sortutako hondakinak biltzeko gailu estankoak (bidoiak, eta abar) ezarriko dira obran zehar eta izaeraren arabera bereiziko dira. Hori guztia, aipatutako gune garbian aldi baterako biltegiratu aurretik egingo da, eta horretarako, kontratistak dituenak edo Cespa G.R., S.A. enpresak Mutiloako zabortegiaren instalazioetan dituenak erabiliko dira.

E.1.7.– Paisaia-integrazioa.

Gune berri batean obrak abiatzean, landare-lurra erretiratuko da, pilatuko da edo zuzenean zabortegia zigilatzeko erabiliko da.

E.1.8.– Obraren garbiketa eta akabera.

Obra amaitu ondoren, garbiketa-kanpaina zorrotz bat burutuko da, eta proiektuaren eragin-eremua obra-soberakinez guztiz garbi geratu beharko da.

E.1.9.– Lan-programa diseinatzea.

Kontratistak ekintza-proposamen xehatu batzuk egin beharko ditu ondorengo azpiataletan adierazitako alderdiei buruz. Proposamen horiek, Ebazpen honetan kasu bakoitzerako ezartzen diren irizpideen arabera diseinatuko direnak, obra-zuzendaritzak espresuki onetsi beharko ditu, aurreko atalean aipatutako ingurumen-aholkularitzak aurrez txostena eginda, eta lanak burutzeko programan txertatuko dira. Jarraian zehaztukoak dira agiriak:

Kontratistaren instalazioen guneen kokapenari eta ezaugarrien eta hondakinak aldi baterako gordetzeari buruzko xehetasunak, Ebazpen honen E.1.1 atalean aurreikusitakoaren arabera.

Ebazpen honen E.1.2 atalak aipatzen dituen interesa duten eta okupazio zuzena aurreikusita ez dagoen landaredi-guneak kartografian xehetasunez seinaleztatzea.

Ebazpen honen E.1.3 atalean aurreikusitako solido esekiei eusteko gailuen xehetasunak eta kokapena.

Ebazpen honen E.1.4 atalean aurreikusitako ibilgailuak garbitzeko gailuen xehetasunak eta kokapena.

E.1.10.– Jarraibide egokien kontrola obren garapenean zehar.

Obrak garatu bitartean jardunbide egokien kontrol bat egingo da, arreta berezia jarriz eragindako azalerari eta ingurune urtarraren babesari, hondakinen kudeaketari (hondeaketako soberakinak barne), solido esekiei eusteko gailuen funtzionamenduari, hautsa eta zarata egiteari, eta Ebazpen honetan adierazitako beste alderdi batzuei.

E.1.11.– Obra-amaierako txostena.

Obra bukatu eta hilabeteko epean, Cespa G.R., S.A. enpresak obra zuzendaritzak sinatutako obra-amaierako ziurtagiria bidali beharko dio ingurumen organoari. Honako agiriak jaso behar ditu:

Obren garapenean zehar sortutako gorabeherak.

Ebazpen honetan jasotako neurri babesle eta zuzentzaileen betetze-maila, nola hondeaketa-materialen kudeaketa zuzena gauzatzeko ingurumen organoak eskatutako neurriena.

Hala badagokio, obra gauzatu bitartean gehitu diren aldaketak. Xehetasunez dokumentatu beharko dira, segurtasuna edo ingurumenaren babesaren murrizketa ez dutela ekartzen egiaztatuz (dagokionean, kalkulu justifikagarriak). «As built» planoak gehituko dira.

Obran barrena garatutako ingurumena zaintzeko programaren emaitzen txostena, sortu diren hondeaketa-materialen helmuga zehatza eta kopurua gehituz.

Eraikitakoaren kalitatearen berme-kontrolaren emaitzak jasotzen dituen txostena, bereziki, geosintetikoen instalazioarena edo in situ trinkotutako material mineralekin egindako hesi geologiko artifizialen instalazioarena.

E.2.– Instalazioaren jardunerako baldintza orokorrak.

E.2.1.– Hondakinak jaso eta ikuskatzeko baldintzak eta kontrolak.

Hondakinak deuseztatu daitezen zabortegian utzi ahal izango dira, baldin eta aurretiazko tratamendua jaso badute edo horien baliotzea teknika, ekonomia edo ingurumenaren aldetik bideragarria ez dela behar bezala justifikatzen bada. Ondorioz, zabortegira iritsi eta baliotu daitezkeen hondakinak bereizi eta dagokien banakako edukiontzietan gorde behar dira, helburu horretarako balioztagune baimendura eraman arte. Horretarako, gaur egungo egoera kontuan izanda, baliotu daitezkeen hondakinak hauek dira: papera eta kartoia, metalak, obra-hondakinak, beira, zura, plastikozko eta metalezko ontziak, 1.400 mm baino kanpo-diametro txikiagoa duten erabiltzen ez diren pneumatikoak, bizikletenak izan ezik. Zerrenda handitu egingo da, hondakin berriak baliotzeko kudeatzaile baimenduak sortzen diren neurrian.

Zabortegian ezabatu daitezen onartutako hondakinak, hondakinak baliotzeko eta ezabatzeko eragiketak eta Hondakinen Europako Zerrenda argitaratzen dituen otsailaren 8ko MAM/304/2002 Aginduaren bidez argitaratutako Hondakinen Europako Zerrendaren arabera sailkatuta daude eta Ebazpen honetako I. eranskinean adierazitakoak dira.

– 190304 kodean zehaztutakoen bestelakoak diren hondakin egonkortuak (HEZ kodea 19 03 05).

– 190306 kodean zehaztutakoen bestelakoak diren hondakin solidotuak (HEZ kodea 19 03 07).

Ondorengo baldintzak dituzten hondakinak ez dira inolaz ere onartuko:

– 50 gradu zentigradu baino tenperatura handiagoa duten hondakinak.

– % 65eko hezetasuna baino handiagoa duten hondakinak.

Hondakin ez-arriskutsu horiek, Euskal Autonomia Erkidegoko ingurumen organoak «Euskal Herriko zabortegietan hondakinak onartzeko irizpideak eta prozedurak» izeneko agirian ezarritako arauetan hondakin ez-arriskutsuen zabortegietarako ezarritako onarpen-irizpideak bete beharko dituzte.

Nolanahi ere, hondakinak onartu ahal izateko, lixibiatze-saiakuntzak egin beharko dira, UNE-EN 12457-4 arauaren arabera «Hondakinak karakterizatzea. Lixibiatzea. Hondakin pikortsuak eta lohiak lixibiatzeko adostasun-saiakuntza. 4. zatia: 10 l/kg-ko likido/solido erlazioa duen etapa baten lotekako saiakuntza, 10 mm-tik beherako partikula-tamaina duten materialetarako (tamaina-txikitzea izan edo ez)».

Hainbat parametrotan ezarritako mugak gainditzen badira perkolazio-saiakuntzak onartu ahal izango dira NEN-7343 arau holandarraren arabera. Dena dela, saiakuntzak Euskal Autonomia Erkidegoko ingurumen organoak arlo horretan ezarritako artezpideen arabera egin beharko dira.

Zabortegiaren perimetro-itxitura izan beharko da, ustiapenaren kanpoko langileak sar ez daitezen. Plastiko arinak eta partikulatutako materiala sakabanatzea murriztuko duen elementuaren bidez osatuko da itxitura.

Instalazioak sarrera bakarra izango du, eta sarrerak pasabide kanadarra izango du, ganadua eta kanidoak barrura sar daitezen eragozteko.

Cespa Conten, S.A. enpresak hilero hondakinen onarpen-agiriak eta jarraipen eta kontrolerako agiriak ondo beteta bidali beharko dizkio ingurumen organoari, hondakin geldo eta geldotuen kudeaketari buruzko arazoaren 2ko 423/1994 Dekretuaren 17, 18 eta 19. artikuluetan ezarritakoa betez. Ahal bada, agiri horiek transakzio elektroniko bidez bidaliko zaizkio Ingurumen Sailburuordetzari, IKS-L03 Sistemaren erakundeentzako bertsioa erabiliz. Sistema informatiko hau erabiliz, kudeatzaileak ez ditu aurretik aipatutako agiriak hilero bidali beharrik izango.

Cespa Conten, S.A. enpresak isuritako edo baimendutako hondakinen balioztatzaileari igorritako hondakinen laburpena urtero bidali beharko dio ingurumen organoari formatu elektronikoan, honako hauek adieraziz:

– Hondakinaren sailkapena, hondakinak baliotzeko eta ezabatzeko eragiketak eta Europako Hondakinen Zerrenda argitaratzen dituen otsailaren 8ko MAM/304/2002 Aginduaren bidez argitaratutako Europako Hondakinen Zerrendaren arabera.

– Hondakinaren kopurua (tonaka).

– Hondakinaren sortzailea.

– Helmugako hondakinen kudeatzailea.

E.2.2.– Lixibiatuen sorkuntza murrizteko ustiapenaren baldintzak.

Zabortegia ustiatzean euri-uren eragin zuzena jasan dezaketen hondakinen gehienezko azalerak ez du inolaz ere 10.000 m² balioa gaindituko.

Zabortegiko gelaxka baten zigilatzea ez da 90 egun baino gehiagoko epean abiatuko, aurreikusitako akaberako kotetara iristen den unetik kontatzen hasita. Zigilatze hau aldi baterako zigilatzea izango da, azaleraren gainean proiektuak ondorengo faseetan hondakinak uztea aurreikusten duenean, edo behin betiko zigilatzea izango da, aipatu azaleraren gainean akaberako zigilatzea ezarri behar denean. Kanpoko arrazoiak direla-eta (meteorologikoak, materialaren erabilgarritasuna, eta abar) akaberako zigilatzea epe horren barruan hastea ezinezkoa bada, aldi baterako zigilatzea ezarriko da, trinkotutako lurrez edo geomintz batez osatua, iragazketa murriztuko duena eta perimetro-kanaletara zuzenduko diren ur garbiez osatutako gainazaleko jariatzea osatzea ahalbidetuko duena. Nolanahi ere, behin betiko zigilatzea 9 hilabete baino lehen abiatuko da eta 12 hilabete baino lehen bukatuko da, hondakinak aurreikusitako gelaxkaren akaberako kotetara iristen diren unetik kontatzen hasita.

E.2.3.– Baldintzak hondakinen arloan.

E.2.3.1.– Isurketen sailkapena, jatorria, ingurune hartzailea eta kokapena.

Isurketa sortzen duen jarduera mota nagusia: hondakin egonkortu eta solidotuen zabortegia.

Jarduera-taldea: 0-Zerbitzuak.

Klasea: 1-EJSN: 92150. Zabor eta hondakinak erraustu eta ezabatzeko zerbitzua.

(Ikus .PDF)

E.2.3.2.– Gehienez isuri daitezkeen emari eta bolumenak.

a) Lixibiatuen isurketa.

(Ikus .PDF)

E.2.3.3.– Isurtzeko muga-balioak.

Ibilgurako isurien ohiko kutsadura-parametroak ondoren zerrendatutakoak izango dira bakarrik, bakoitzerako zehazten diren gehienezko balioekin:

a) Lixibiatuen isurketa.

(Ikus .PDF)

Metalen kontzentrazioak elementu horien «guztizko» edukiari dagozkio.

Ezingo dira diluzio-teknikak erabili isurtzeko muga-balioak lortzeko.

E.2.3.4.– Araztu eta husteko instalazioak.

Sustatzaileak aurkezturiko agiriak oinarri hartuta, arazketa-instalazioek edo hondakin-urak zuzentzeko neurriek honako jarduera hauek barne hartuko dituzte funtsean:

a) Tratamendu fisiko-kimikoko instalazioa, egonkortu eta solidotuen gelaxkako lixibiatuak tratatzeko, tratamendu biologikoa egin aurretik.

Instalazioaren osagaiak honakoak dira: sarrerako emari-neurgailu; pH egokitzeko ganbera, irabiagailuarekin, kare-esnearen gehitzea eta neurtzeko ph-metroa; nahasketa-ganbera azkarra, irabiagailuarekin, aluminio sulfatoa eta polielektrolitoa gehitzea; orrizko dekantagailua solidoen banaketarako, eta tratatutako uren ponpaketa lixibiatuen biltegiratze-zuloetara.

b) Homogeneizazioa, egonkortu eta solidotuen gelaxkako tratatutako uren eta ez-arriskutsuen gelaxkatik datozen uren nahasketa eta homogeneizaziorako. Homogeneizazio ona lortzeko, irabiatze-aireztatze sistema izango da.

c) Tratamendu biologikoa, lohi aktiboen tratamenduan datzana, aireztatze luzearen modalitatean, aurretiko ganbera anoxikoarekin. Ikatzetik eratorritako gai organikoa ezabatzeko, eta konposatu nitrogenatuen nitrifikazio eta desnitrifikazioa. Nitrifikazio-desnitrifikazioa duen tratamendu biologiko horren osagai nagusiak honakoak dira:

– 1.000 m³ ahalmena duen erreaktore biologikoa konpartimentazioarekin. Hondoko domoak airea sartzeko.

– Erreaktore desnitrifikatzailea, 500 m³ -ko ahalmena eta bi irabiagailu murgildurekin.

– Bigarren mailako dekantagailua, 5 metroko diametroarekin. Zubi mugikorra lohi-arrasparekin.

– Lehen mailako dekantagailua, 7,5 metroko diametroarekin. Lohiaren irteera hondotik, zubi mugikorreko lohi-arrasparen bidez. Ur arazien irteera goiko gainetik.

– Berriz zirkulatzeko eta lohien purgarako putzua dagozkien ponpa eta maila-zundekin.

– Lohiak kontzentratzeko zuloa.

– Bi kutxeta uraren irteerarako. Bata, emari-neurgailu magnetikoarekin eta bestea, laginak hartzeko.

– Erreaktiboak: atxikipen-kubeta baten barruan azido fosforikoa, aluminio sulfatoa eta aparraren aurkakoa biltegiratzen dira. Beste atxikipen-kubeta batean azido azetikoa biltegiratzen da.

– Koadro elektrikoa, alarmak eta adierazleak dituen fluxu-diagramarekin.

Kamioien gurpilak garbitzeko sistemaren ezaugarriak adierazi beharko dira. Sistema sareta eta arrabolez osatuta egon beharko da, haren gainean kamioien gurpilak pasatu ahal izateko, aspertsore batzuen bidez botatako presiozko uraren bidez garbitzen diren bitartean. Garbiketako ura birziklatu eta lohiak modu automatikoan erauziko dira (Arquimedesen torlojuaren edo antzekoaren bidez). Gurpilak garbitzeko sistemaren saretak edo arrabolek gutxienez garbitu beharreko gurpil handienaren luzera izan beharko dute.

Gurpilak garbitzeko sistemaren gainezkaldi eta ihesak jaso eta zabortegiko masara edota lixibiatuen araztegira eramango dira; ezingo dira ibilgura bota.

Gutxienez, ondorengo kontrol-kutxetak jarriko dira; kutxeta horiek isurketen lagin esanguratsuak lortzeko beharrezko ezaugarri guztiak izango dituzte:

– Ez-arriskutsuen gelaxkatik eratorritako lixibiatuen jasotze-kutxeta (lixibiatuen zuloaren aurretik).

– Egonkortu eta solidotuen gelaxkatik eratorritako lixibiatuen jasotze-kutxeta (lixibiatuen zuloaren aurretik).

– Lixibiatu araztuen irteera.

– Ondorengo kontrolerako gailuak izango dira gutxienez:

a) Emari-neurgailua edo ordu-kontagailu bidez, etab. neurtzeko sistema, ez-arriskutsuen gelaxkako lixibiatuak jasotzeko sarean eta emari-neurgailua egonkortu eta solidotuen gelaxkako lixibiatuetarako.

b) Ur araztuetarako emari-neurgailua.

c) Ph neurgailua eta ur tratatuen azken kontroleko konduktibitate-neurgailua, dagozkien alarma-sistemak, neurketen tokiko adierazpena eta biltegiratze jarraikia euskarri informatikoan dituena.

d) Plubiometroa.

e) Lurrazpiko uren kontrolerako piezometroak. Gutxienez, zabortegitik uretan gora, lurrazpiko uren sarrera-fluxuaren norabidean dagoen puntu batean eta, gutxienez, zabortegitik uretan behera eta irteera-fluxuaren norabidean, bi puntu.

Isurketak, bere konposizioagatik, ezarritako mugak betetzeko zailtasunak baditu, horiek betetzea bermatuko duen tratamendu-sistema instalatuko da. Proiektu hori aurrez aurkeztuko du Ingurumen Sailburuordetzaren aurrean onar dezan.

E.2.3.5.– Isurketen kontrol-kanona.

Uraren Legearen Testu Bateginaren 113. artikulua eta Jabari Publikoko Urguneen Erregelamenduaren (606/2003 Errege Dekretua) 291. artikulua aplikatuz, honakoa da isurien kontrol-kanona:

(IKK): Isurketen Kontrol Kanona= B x Pu.

Pu = Po x Km.

Km = K2 x K3 x K4.

Honela ulertuta:

B = Isurketa baimenduaren bolumena (m³/urte).

Pu = Isurketaren kontroleko prezio unitarioa.

Po = Oinarrizko prezioa m3-ko isurketaren izaeraren arabera.

Km = Isurketaren maiorazioko edo minorazioko koefizientea.

K2 = Isurketaren ezaugarrien araberako koefizientea.

K3 =Isurketaren kutsadura-mailaren araberako koefizientea.

K4 = Ingurune hartzailearen ingurumen-kalitatearen araberako koefizientea.

Lixibiatuen isurketa:

(Ikus .PDF)

Km = 1 x 2,5 x 1,12 = 2,80000.

Pu = 0,03005 x 2,80000 = 0,08414 euro/m3.

E.2.4.– Instalazioan sortutako hondakinak egoki kudeatzen direla bermatzeko baldintzak.

Instalazioetan sortzen diren hondakin guztiak hondakinei buruzko apirilaren 21eko 10/1998 Legean eta aplikatzekoa den berariazko gainerako araudian xedatutakoari jarraituz kudeatuko dira; hondakinak karakterizatu egin beharko dira euren izaera zehaztu eta helburu egokiena erabakitzeko.

Espresuki debekatuta dago sortzen diren tipologia desberdineko hondakinak elkarrekin edo beste hondakin nahiz efluente batzuekin nahastea; hondakinak jatorritik bertatik bereiziko dira eta horiek bildu eta biltegiratzeko bide egokiak jarriko dira, nahasketa saihesteko.

Hondakinen kudeaketari buruzko printzipio hierarkikoei jarraituz, hondakin oro baliotu egin behar da eta horretarako balioztagune baimendu batera eraman behar dira. Hondakinak ezabatu ahal izango dira, baldin eta horiek baliotzea teknika, ekonomia edota ingurumen aldetik bideragarria ez dela behar bezala egiaztatzen bada. Birsortzea eta berrerabiltzea lehenetsiko dira baliotzeko beste modu material edo energetikoren aurretik.

Era berean, hondakinak tratatzeko Euskal Autonomia Erkidegoan instalazio baimenduak badaude, instalazio horietara bidaliko dira lehentasunez, autosufizientzia- eta gertutasun-printzipioei jarraituz.

Espresuki debekatuta dago sortzen diren tipologia desberdineko hondakinak elkarrekin edo beste hondakin nahiz efluente batzuekin nahastea; hondakinak jatorritik bertatik bereiziko dira eta horiek bildu eta biltegiratzeko bide egokiak jarriko dira, nahasketa saihesteko.

Azken helmuga zabortegian ezabatzea duten hondakinen karakterizazioa Euskal Autonomia Erkidegoko ingurumen organoak «Euskal Herriko zabortegietan hondakinak onartzeko irizpideak eta prozedurak» izeneko agirian ezarritako arauen arabera egingo da.

Hondakinak biltzeko eremuek lurzoru estankoa izan beharko dute. Egoera fisiko likidoan edo oretsuan dauden edo oso bustita daudelako isurketak edo lixibiatuak sor ditzaketen hondakinen kasuan, horiek biltzeko kubeta edo sistema egokiak jarriko dira, ezbeharrez gerta daitezkeen isurketak kanpora irten ez daitezen. Hondakina hautsa bada, euri-urarekin kontakturik izan dezan edo haizeak arrasta dezan saihestuko da; behar izanez gero, estali egingo da.

Hondakinek desagertu, galdu eta ihes egingo balute, berehala jakinaraziko da gertatutakoa Ingurumen Sailburuordetzan eta Larrabetzuko Udalean.

E.2.4.1.– Hondakin arriskutsuak.

Sustatzaileak adierazitako hondakin arriskutsuak hauek dira:

• 1. Prozesua: «Zerbitzu orokorrak».

– 1. hondakina: «Laborategiko hondakina».

Identifikazioa: A48060057/48005846/1/1.

Hondakinaren kodea: Q7//D13//L40//C32/24//H8//A936(5)//B0019.

HEZ: 16 05 06.

Urtean sortutako kantitatea: 50 kg.

– 2. hondakina: «hidrokarburoekin kutsatutako materiala».

Identifikazioa: A48060057/48005846/1/2.

Hondakinaren kodea: Q5//D15//S34//C41/51//H5//A936(5)//B0019.

HEZ: 15 02 02.

Urtean sortutako kantitatea: 15 Kg.

– 3. hondakina: «Erabilitako olioa».

Identifikazioa: A48060057/48005846/1/3.

Hondakinaren kodea: Q7//R13//L08/C51//H5/6//A936(5)//B0019.

HEZ: 13 01 11.

Urtean sortutako kantitatea: 13 Kg.

– 4. hondakina: «Ontzi huts kutsatuak».

Identifikazioa: A48060057/48005846/1/4.

Hondakinaren kodea: Q7//R13//S36//C41/51//H5//A936(5)//B0019.

HEZ: 15 01 10.

Urtean sortutako kantitatea: zehaztu beharrekoa.

a) Hondakin arriskutsuak biltzeko sistemak bereiziak izango dira, duten tipologia dela eta, isuriren bat gertatuz gero, nahasi, arriskutsuago bihurtu edo kudeaketa zaildu dezaketen kasuetan.

b) Hondakin arriskutsuak jasotzen dituzten ontziek, hondakin toxiko eta arriskutsuei buruzko maiatzaren 14ko 20/1986 Oinarrizko Legea betearazteko erregelamendua onartzen duen uztailaren 20ko 833/1988 Errege Dekretuak 13. artikuluan ezarritako segurtasun-arauak kontuan izan beharko dituzte, eta itxita egongo dira kudeatzaileak jaso arte, isuri edo lurrundu ez daitezen.

c) Aurreko atalean aipatzen diren ontziek etiketatuta egon beharko dute, eta etiketak argia, irakurtzeko modukoa eta ezabaezina izan beharko du; etiketa 1988ko uztailaren 20ko 833/1988 Errege Dekretuak 14. artikuluan horretarako adierazitako jarraibideen araberakoa izango da.

d) Hondakin arriskutsuak gordetzeko denbora ezingo da 6 hilabetetik gorakoa izan.

e) Hondakinak kudeatzaile baimenduaren instalazioetara eraman aurretik, nahitaezko baldintza izango da agiri baten bidez egiaztatzea kudeatzaile baimendu horrek hondakinak onartu dituela. Agiri horretan hondakinak onartzeko baldintzak ezarriko dira, eta egiaztatu egingo da tratatu beharreko hondakinaren ezaugarriak administrazio-baimenarekin bat datozela. Agiri hori Ingurumen Sailburuordetzara bidaliko da hondakina lehenengoz erretiratu aurretik eta, behar izanez gero, hondakin-kudeatzaile berri batengana eraman aurretik. Beharrezkoa izanez gero, karakterizazio xehatua egingo da, proposatutako tratamenduaren egokitasuna egiaztatzeko. Hala badagokio, arrazoitu egin beharko da proposatutako kudeaketa-modua Ebazpen honetako hondakinen kudeaketari buruzko printzipio hierarkikoei egokitzen zaiela.

f) Hondakin arriskutsuak eraman aurretik eta, hala badagokio, araudian ezarritako aurretiazko jakinarazpena egin ondoren, kontrolerako eta jarraipenerako agiria bete beharko da. Agiri horren zati bat garraiolariari emango zaio, zamarekin batera jatorritik helmugaraino eraman dezan. Cespa Conten, S.A. enpresak artxibategian gorde beharko ditu onarpen-agiriak eta kontrolerako zein jarraipenerako agiriak, edo horien agiri ofizial baliokidea, bost urtean gutxienez.

g) Egiaztatu egin beharko da hondakin arriskutsuak kudeatzaile baimenduaren instalazioetara eramateko erabiliko den garraiobideak horrelako gaiak garraiatzeko indarrean dagoen legerian ezarritako baldintzak betetzen dituela.

h) Cespa Conten, S.A. enpresak ekainaren 2ko 679/2006 Errege Dekretuari, Industrian erabilitako olioaren kudeaketa arautzen duenari, jarraituz kudeatu beharko du sortutako olio erabilia.

i) Ekainaren 2ko 679/2006 Errege Dekretuan aurreikusitako baimendutako kudeaketa bateraturako sistema bat ezartzen ez den bitartean, irailaren 29ko 259/1998 Dekretuan, Euskal Autonomia Erkidegoan erabilitako olioaren kudeaketa arautzen duenean, begiesten diren aurreikuspenak bete beharko ditu Cespa Conten, S.A. enpresak.

j) Cespa Conten, S.A. enpresak PKB eduki dezaketen gailuak dituenez, nahitaez bete behar ditu poliklorobifeniloak, polikloroterfeniloak eta horiek dituzten gailuak ezabatu eta kudeatzeko neurriak ezartzen dituen abuztuaren 27ko 1378/1999 Errege Dekretuaren baldintzak, eta errege dekretu hori aldatzen duen otsailaren 24ko 228/2006 Errege Dekretua.

Europako Parlamentuaren eta Kontseiluaren 2000ko ekainaren 29ko 2037/2000 EE Arautegian ozono-geruza agortzen duten substantzia batzuk zehazten eta arautzen dira. Cespa Conten, S.A. enpresak era horretako substantziarik badu, substantzia horiek bildu eta suntsitu egingo dira aldeek erabakitako bide teknikoak erabiliz edota ingurumen ikuspuntutik onar daitekeen suntsiketarako beste edozein bide erabiliz; hondakin horiek birziklatu edo birsortu egingo dira bestela, aparailuak aztertu eta mantentzeko lanen aurretik nahiz desmuntatu eta suntsitu baino lehen.

Amiantoa duten hondakinak antzemanez gero, Cespa Conten, S.A. enpresak 108/1991 Errege Dekretuan, amiantoak ingurumenean sortzen duen kutsadura saihestu eta gutxitzekoan, ezarritako eskakizunak bete beharko ditu. Era berean, amiantoa duten hondakinak kudeatzeko egingo diren manipulazioak martxoaren 31ko 396/2006 Errege Dekretuan ezarritako aginduen arabera burutuko dira; dekretu horren bidez ezarri ziren amiantoarekin lan egitean segurtasun- eta osasun-arloan bete behar diren gutxieneko baldintzak.

k) Erregistro bat edukiko du, hondakin arriskutsuei buruzko datu hauek agerrarazteko: kopurua, izaera, identifikazio-kodea, jatorria, tratatzeko metodo eta tokiak, sorrera- eta lagapen-datak, biltzeko maiztasuna eta garraiatzeko modua, uztailaren 20ko 833/1988 Errege Dekretuaren 17. artikuluan ezarritakoa betez, eta uztailaren 20ko 952/1997 Errege Dekretuaren bidezko aldaketan ezarritakoa betez. Sei hilean behin, Ingurumen Sailburuordetzari kontrolerako erregistro horren kopia bidaliko dio.

l) Aurreko e), f) (kudeatzaileak EAEn daudenean) eta k) ataletan adierazitako agiriak Ingurumen Sailburuordetzara bidaliko dira, ahal dela transakzio elektroniko bidez, IKS-L03 Sistemaren erakundeentzako bertsioa erabilita.

E.2.4.2.– Hondakin ez-arriskutsuak.

Sustatzaileak adierazitako hondakin ez-arriskutsuak hauek dira:

(Ikus .PDF)

a) Prentsa-iragazkitik datozen lohi deshidratatuen kasuan, hondakin horiek ispilu-sarrera dute gaur egun indarrean dagoen hondakinen Europako zerrendan. Bada, horiek hondakin ez-arriskutsutzat hartuko dira, baldin eta hondakin horiek lehenengo aldiz ebaluatu baino lehen karakterizatzen badira; karakterizazio horren emaitzak Ingurumen Sailburuordetzara bidali beharko dira, proposatutako kudeaketa egokia ote den egiaztatzeko. Baldin eta hondakin hori arriskutsua dela ezartzen bada, Ebazpen honetako E.2.4.1 atalean jasotako xedapenak aplikatuko dira.

b) Erabilitako ontziak eta ontzi-hondakinak gaika behar bezala bereizi eta eragile ekonomiko bati emango zaizkio (hornitzaileari), erabilitako ontzien kasuan berriro erabili ahal izateko; ontzi-hondakinak, berriz, berreskuratzaile, birziklatzaile edo balioztagune baimendu bati.

c) Hondakin horiek ezabatzeko direnean ezin dira urtebete baino gehiagoz biltegiratuta eduki. Hondakinen azken helburua baliotzea denean, 2 urtez gorde ahal izango dira.

d) Oro har, hondakinak hustu aurretik, kudeatzaile baimendu batek onartzen dituelako agiria izan beharko dute, onarpen horretarako baldintzak zehaztuta. Agiri horren kopia bidali beharko da Ingurumen Sailburuordetzara, proposatutako kudeaketa egokia dela eta Ebazpen honetan ezarritako oinarrizko printzipioak betetzen direla egiaztatzeko. Hala badagokio, arrazoitu egin beharko da proposatutako kudeaketa-modua Ebazpen honetako hondakinen kudeaketari buruzko printzipio hierarkikoei egokitzen zaiela. Cespa Conten, S.A. enpresak artxibategian gorde beharko ditu onarpen-agiriak eta kontrolerako zein jarraipenerako agiriak, edo horien agiri ofizial baliokideak, bost urtean gutxienez.

e) Hondakinen kudeaketari buruzko printzipio hierarkikoei jarraituz, hondakin oro baliotu egin behar da eta horretarako balioztagune baimendu batera eraman behar dira. Hondakinak ezabatu ahal izango dira, baldin eta horiek baliotzea teknika, ekonomia edota ingurumen aldetik bideragarria ez dela behar bezala egiaztatzen bada. Birsortzea eta berrerabiltzea lehenetsiko dira baliotzeko beste modu material edo energetikoren aurretik.

f) Halaber, hondakin geldo eta geldotuen kudeaketari buruzko azaroaren 2ko 423/1994 Dekretuarekin bat etorriz, hondakin ez-arriskutsuak zabortegi baimendu batera eraman aurretik, jarraipenerako eta kontrolerako dagokion agiria bete beharko da. Agiri horiek bost urtez gorde beharko dira.

g) Erregistro bat egingo da, hondakin arriskutsuei buruzko datu hauek agerrarazteko: kopurua, izaera, identifikazio-kodea, jatorria, tratatzeko metodo eta tokiak, sorrera- eta lagapen-datak, biltzeko maiztasuna eta garraiatzeko modua. Urtero, Ingurumen Sailburuordetzari bidaliko zaio kontrolerako erregistro horren kopia.

h) Aurreko d) eta e) (kudeatzaileak EAEn daudenean) eta f) ataletan adierazitako agiriak Ingurumen Sailburuordetzara bidaliko dira, ahal dela transakzio elektroniko bidez, IKS-L03 Sistemaren erakundeentzako bertsioa erabilita.

E.2.5.– Lurzorua babesteko baldintzak.

Lurzorua kutsa dezaketen jardueren zerrenda eta kutsatutako lurzoruen adierazpenerako irizpideak eta estandarrak ezartzen dituen urtarrilaren 14ko 9/2005 Errege Dekretuak xedatutako betebeharrak betetze aldera lurzoruaren egoerari buruz aurretiaz aurkeztutako txostenaren arabera, eta txosten horrek jasotako gomendioak jarraituz, Cespa Centen, S.A. enpresak une oro materialak biltegiratzeko gunea eta urak husteko sistema modu egokian mantentzen direla ziurtatuko duten jardunbide egokiak ezartzea proposatu beharko du. Neurri horiek prebentziozko mantentze-lanen eskuliburuan jasoko dira, eta baita ikuskatze eta kontrol programa eguneratua ere.

Hautsezko materialak arrastaka eramatea minimizatuko da, ondorengo neurriak ezarriz:

– Haize gogorra dabilenean hautsezko solidoak manipulatzea saihestu.

– Materialak paletatik deskargatzean, garaiera mugatu.

Lurzorura substantziak isurtzea murriztuko da, ondorengoak bezalako neurri orokorrak aplikatuz:

– Biltegiratzeko substantzia likido guztiek eusteko kutxetak izango dituzte.

– Ahal den neurrian, ontzien artean substantzia likidoak aldatzea saihestuko da.

Cespa Conten, S.A. enpresak jarduera garatzen duen lur-zatian lur-mugimenduak sustatzen baditu, enpresak hondeatu behar dituen materialen karakterizazioa egin beharko du, jardun kutsatzaileen ondorioz erasan diren egiaztatzearren eta, karakterizazio horren emaitzen arabera, horientzako kudeaketa-modu egokiena zehaztearren.

Karakterizazio horretan lortutako emaitzak, material horiek kudeatu aurretik Ingurumen Sailburuordetzara bidaliko dira, baloratzeko. Ingurumen-organoak, ebazpen arrazoitu bidez, lurzoruaren kalitatearen adierazpena egiteko prozedura hastea eskatu ahal izango du kutsadura-zantzurik antzemanez gero, lurzorua ez kutsatzeko eta kutsatutakoa garbitzeko otsailaren 4ko 1/2005 Legearen 17.6 artikuluan xedatutakoari jarraiki.

Halaber, lurzoruaren egoeraren aurretiazko txostenaren ondoriozko prebentzio eta defentsa neurriak aplikatu direla eta ondo funtzionatzen dutela bermatuko da; baita ingurumen organoak egoki irizten dituenak edo adierazten dituenak ere.

Cespa Conten, S.A. enpresak egindako jarraibideak aurkeztu beharko ditu organo honen aurrean, atal honetan ezarritakoari jarraituz enpresak proposatutako prozedurak modu xehatuan jasoz.

E.2.6.– Zaratari buruzko baldintzak.

Jarraian adierazitako zarata-mailak ez gainditzeko neurriak hartu eta instalatuko dira:

a) Jarduera maila hauei egokitu behar zaie: etxebizitzen barrualdean entzungo den zarata ezin izango da inoiz ere 40 dB (A) baino handiagoa izan Leq 60 segundo etengabeko balioan neurtuta, 08:00ak eta 22:00ak bitartean, ezta 45 dB (A) ere gehienezko balioetan.

b) Jarduera maila hauei egokitu behar zaie: etxebizitzen barrualdean entzungo den zarata ezin izango da inoiz ere 30 dB (A) baino handiagoa izan Leq 60 segundo etengabeko balioan neurtuta, 22:00ak eta 08:00ak bitartean, ezta 35 dB (A) ere gehienezko balioetan.

c) Era berean, zarata ezin da 60 dB (A) baino handiagoa izan, Leq 60 segundo etengabeko balioan neurtuta, industria-eremuaren kanpoko itxituran.

d) Zamalanetan eta materiala kamioietan garraiatzean egiten den zaratak ez du handituko sentsibilitate akustiko handieneko guneetako zarata-maila.

E.2.7.– Paisaiari buruzko baldintzak.

Paisaia babesteko ezarritako neurriak (instalatutako landare-pantailak, perimetro-itxitura) nola hondakin ez-arriskutsuen zabortegiaren paisaia-integrazioa, elementuak ezkutatzea eta landaredia naturala berreskuratzea hobetu dezaketen neurriak modu egokian mantentzen direla bermatu beharko da.

Hondakinak isurtzeko ontzitik kanpora sakabanatzea eragozteko, esaterako, baldintza meteorologikoak txarrak direnean, beharrezko neurriak ezarriko dira une bakoitzean. Halaber, bertan utzitako hondakinek usaina baldin badute, eragozpen hori murrizteko neurri eraginkorrak ezarriko dira.

Ezohiko arrazoiak direla-eta isurtzeko ontzitik kanpora hondakinak sakabanatuko balira, Cespa Conten, S.A. enpresak berehala bildu beharko ditu.

E.2.8.– Airearen kalitatea babesteko baldintzak.

Sustatzaileak aurkezturiko agiriak oinarri hartuta, arazketa-instalazioek edo hondakin-urak zuzentzeko neurriek honako jarduera hauek barne hartuko dituzte funtsean:

– Biogasaren ebakuaziorako tximiniak eta eroanbideak: tximiniak zabortegiaren drainatze-sisteman daude tartekatuta eta 1,5 metroko diametroa eta metro bateko altuera duten hormigoi-aro batzuez osatuta. Zulatuak. Lotuak eta zabortegiaren hondotik gainazaleraino instalatuak. Horien funtzioa lixibiatuei hondakinaren sakonera desberdinetan sartzeko eta sortzen diren gasak ebaluatzeko aukera eskaintzea da.

– Zabortegia ustiatzean sortutako gasen erauzketa dentsitate altuko polietilenoko drainatze-tximinien bidez egingo da, legarrezko inguratzailearekin artekatua. Putzuaren eraginaren eremua 25 metrokoa denez, zabortegiaren azalera osoa hartuko du, bertara airerik ez sartzeko eta horrela, zabortegiko zigilatu gabeko guneetatik barrena atmosferara isurtze barreiatuak saihesteko.

– Ebazpen hau aurkezten denetik sei hilabeteko epean, sustatzaileak ondorengo agiriak aurkeztuko ditu:

a) Putzuen eta bilketako gasen karakterizazioaren analisia, kanpoko erakunde batek egindakoa.

– Biogasaren erregulaziorako estazioak. Erre aurretik sortutako gasaren aberastasuna kontrolatzeko balio duten erdiko bi plataformaz osatuak. Horietako bakoitzak honako osagaiak ditu: tximinietako HDPE bost sarrera, bereizle kondentsatua, ainguratze-plantxa, sistema hidraulikoa eta AISI 304 koaleszentzia-iragazkia, fluxu-balbulak, 200 mm-ko diametroko kolektorea, PVCzko tximeleta balbula, gas-irteera HDPE DN200 hodian; eta sakonunean kontrol-panela, bi manometro eta lerro desberdinen konexioak dituena.

– Ez-arriskutsuen gelaxkan sortutako gasa xurgatu eta erretzeko zentralak honako osagaiak ditu: xurgatzailea (biogas-erregailua hornitzen duena), gas-kondentsadorea (hezetasuna ezabatzen duena) eta zuzia.

Zuzia 500 Nm³/h-koa da eta errekuntza-ganbera zilindriko bertikala du; bertan, ganberaren zolan dagoen sugar anitzeko erregailuaren bidez erretzen da biogasa. Errekuntza-tenperatura zuziaren oinarrian xurgatzen den errekuntza-airearen bolumena erregulatuz kontrolatzen da, hegal anitzeko uhate bidez modulatua. Erregailua eskuzko tirokoa da lantza anitzeko banatzailearekin, INOX AISI 304.

Neurtzeko sistema jarraikia izango du, zuziaren erregailua hornitzen duten gasen emaria eta kontzentrazioa neurtzeko. Instalazio honen ezaugarri teknikoak instalazioa egin aurretik aurkeztuko dira Ingurumen Sailburuordetzaren aurrean onar ditzan.

Cespa Conten, S.A. enpresak azterketa-proposamena aurkeztuko du hondakin biodegradagarrien hartzidurak sortzen dituen gasen aprobetxamendu-sistemaren inplementaziorako, egungo tratamendu-sistema (zuzia) ordezkatuko duena.

Aplikatu beharreko irizpideak honako hauek izango dira:

– Putzuetako metano-kontzentrazioa % 40 (bolumenari dagokionez) baino handiagoa denean, erauzitako gasa zabortegiko gasa energetikoki aprobetxatzeko planta batera bideratuko da.

– Putzuetako metano-kontzentrazioa % 25 eta % 40 artean dagoenean, ultrairagazpenaren edo antzeko teknika baten bidez mintza bereizteko sistema ezarriko da, erreusean metano-kontzentrazioa areagotzeko (iragazi gabeko frakzioa). Honela, zabortegiko gasa energetikoki aprobetxatzeko planta batera eraman daiteke frakzio hori; beste frakzioa, aldiz, zuzira eramango da erre dadin.

– Putzuetako metano-kontzentrazioa % 25 eta % 15 artean dagoenean, erauzitako gasa zuzenean bidaliko da zuzi batera erre dadin.

– Putzuetako metano-kontzentrazioa % 5 eta % 15 artean dagoenean, erauzitako gasa zuzira bidaliko da baita ere erre dadin, baina aldez aurretik beste erregai batekin aberastu beharko da, errekuntza ahalbidetzeko.

– Putzuetako metano-kontzentrazioa % 5 baino txikiagoa denean, atmosferara isurtzea baimenduko da, erauzketa bortxaturen beharrik izan gabe (erauzketa pasiboa).

Isurtze barreiatuak murrizteko, hauek edukiko dira:

– Ahal den neurrian, partikula solidoen eta hautsaren isurtzeak sortzea saihestuko da ibilgailuen sarrera eta irteeretan, eta zamalanetan eta hondakinak hedatzean.

– Azalera zati bat (isurketarena) irekita mantenduko da, ahalik eta azalera txikiena, 1.000 m² inguru dituena; gainerakoa estaldura-lurrekin edo polietilenozko xaflarekin estalita mantenduko da.

– Ibilgailuen gehieneko abiadura 20km/h-ra mugatu behar da eta hondakinak garraiatzeko edukiontzi itxiak edo big-bag zakuak erabili behar dira.

E.2.8.1.– Isurtzeko muga-balioak.

a) Kogenerazio Instalazioko biogas soberakina ezabatzeko zuzia, 1.000-1.200 şC arteko tenperaturara iritsiko da eta gutxienez 0,3 segundutan zehar (iraupen-denbora) dagokion turbulentzia mantenduz.

b) Segurtasuna dela-eta instalazioaren jabetzaren mugetan metano gasaren kontzentrazioa ez da % 5 baino handiagoa izango, ezta % 1,25 baino handiagoa ere instalazioaren gune itxietan, kontrolerako sistemen edo gasen berreskuratzearen osagaien kasuan izan ezik.

E.2.9.– Biozidak erabiltzeko baldintzak.

Zabortegiaren instalazioetan bektore biologikoen kontrolerako biozidak erabiliz gero, Osasun eta Kontsumo Ministerioko Osasun Publikoko Zuzendaritza Nagusiaren bioziden erregistro ofizialean biltzen diren produktuak izan behar dute.

Biozidak erabiltzearen alorrean aplika daitekeen arautegiaren kaltetan izan gabe, horiek aplikazioa gutxieneko beharrezkora mugatuko da.

Produktu horiek erabiltzen hasi aurretik, Ingurumen Sailburuordetzari bidali behar zaizkio erabili behar direla aurreikusten diren biosanitarioen segurtasun-fitxa teknikoak. Halaber, hala badagokio, zerbitzu biozidez arduratzen den enpresari jakinarazi beharko zaio.

F) Hondakin ez-arriskutsuen zabortegia zigilatzeko obrak gauzatzeko baldintzak eta betebeharrak:

a) Zabortegiaren akaberako zigilatzearen segida ondorengo geruzez (goitik behera) osatuta egongo da:

– 0,50 m-ko lodiera duen erregularizazio-geruza, Proctor Aldatua entseguaren gehienezko dentsitatearen % 95era trinkotutako hondakin hautatuaz osatua.

– Hesi geologiko artifiziala. 0,60 metroko lodiera eta <= 10-9 m/s-ko iragazkortasuna duen geruza mineral trinkotuaz osatuta egongo da, 0,15 m-ko 4 geruzaz eraikia. Xede horretarako, ezaugarri horiek dituzten hondakin trinkotuak edo antzeko babesa bermatzen duen bentonitazko geokonposatua erabil daitezke.

– 1,5 edo 2 mm-ko lodiera duen dentsitate altuko polietilenozko geomintza (HDPE).

– Iragazketaren ur garbien geruza drainatzailea. Ale formako material natural baten geruzaz osatuta egon daiteke (legarrak edo hareak), azpitik sastatzearen aurkako geozuntzaren bidez geomintzaz bereizia, eta gainetik iragazki-geruzaren bidez, edo drainatzaile-geokonposatuaren bidez. Nolanahi ere, geruza iragazle honen igorgarritasuna drainatzearen luzeraren, drainatzearen isurialdearen eta gaineko lurzoruaren estaldura-geruzaren eroankortasun hidrauliko asearen arabera kalkulatuko da. Horrela, ezarritako geruzaren igorgarritasunak kalkulatutako igorgarritasunarekiko >= 6-ko segurtasun-faktorea (FS) izan dezan eta geruza horren barruan lodiera aseak geruzaren lodiera edo 0,30 m gainditu ez ditzan; txikiena den neurria, hain zuzen ere.

– Gutxieneko 0,60 metroko lodiera duen estaldura-lurzoruaren geruza.

– Gutxieneko 0,15 metroko lodiera duen landare-lurzoruaren geruza.

– Gainazala belarkien bidez estaltzea. Zabortegiaren zigilatzearen gainean zuhaixkak edo zuhaitzak landatzea, helduak direla haien tamaina eta sustraiak, sakontasuna, mota, kokapena edo ezarritako babesak direla-eta, drainatze-geruzaren, geomintzaren edo zigilatzearen hesi geologiko artifizialaren segurtasunari edo funtzionaltasunari ez eragitearen baldintzapean egongo da; eta irristaduraren aurrean landaketak ez du segurtasun-faktorea 1,5etik behera murriztu beharko.

Bestelako zigilatze-segidak proposatu daitezke, modu egokian justifikatuz instalazioaren gorabehera zehatzei aurkeztutako soluzioa.

Ezpondaren eremuetan instalatu aurretik, zigilatzea osatzen duten geruzen egonkortasunaren azterketa egin beharko da, irristaduraren aurrean geruzek =1,5-ko segurtasun-faktorea dutela bermatu ahal izateko.

Zabortegiak gas kopuru adierazgarriak sortzen baditu, hesi geologiko artifizialaren azpian gasak drainatzeko geruza sartu beharko da.

b) Isurialde egokiak izan daitezen, zabortegiaren azaleraren birmoldaketa amaitu ondoren, zabortegiaren azaleraren plano takimetriko bat altxatuko da, okupatuko duen azalera eta zigilatu beharreko azalera definituko duena. Gutxienez metro bateko banda gehigarria okupatuko du, birmoldaketaren ostean zabortegiak okupatutako azalerarekiko. Plano takimetriko horren gainean, zigilatzeko lanetan zehar ager daitezkeen lixibiatuen iturburuak kokatuko dira, horietako bakoitzean hauek zehaztuz: emaria, pH-a, tenperatura, eroankortasun elektrikoa (CE) eta neurketaren data.

c) Zigilatze-lanetan zehar sortzen den eta aldaketa nabarmenak eragiten dituen proiektuaren aldaketa oro Ingurumen Sailburuordetzari jakinarazi behar zaio, balora dezan, eta behar bada, gauzatu aurretik onar dezan.

d) Hondakin ez-arriskutsuen zabortegia zigilatu ondoren, zigilatze-lanen zuzendariak lanak Ebazpen honetan ezarritako baldintza eta betebeharren eta ebazpenaren oinarri den agiri teknikoen arabera bete dela egiaztatu beharko du. Egiaztapena egiteko, obra-zuzendariak sinatutako zabortegia zigilatzeko obra-amaierako ziurtagiria bidali beharko du, ondorengo agiriekin batera:

– Eraikitzeko proiektua («as built»), dagokion elkargo ofizial profesionalak oniritzia emanda duela. Plano-jokoa eta obra-fasean egindako aldaketek Ebazpen honetan eta ebazpenaren oinarri diren agirietan ezarritako baldintza eta eskakizunei dagokienez segurtasunaren murrizketa ekartzen ez dutela adierazten duen justifikazioa. Halaber, obra bukatzerakoan ikusi ezin diren elementuen eta euren ezaugarrien argazki-erreportajea egin beharko du, xehetasunen ikuspegiak nola planoan duten kokalekua azalduz, ikuspegi panoramiko orokor gisa.

– Zigilatze-segidaren landare-lurraren geruzaren gainazalaren plano topografikoa, UTM koordenatuetan eta kota absolutuetan.

– Eraikuntzaren kalitatea kontrolatzeko eta bermatzeko programaren emaitzak. Programa horrek barne hartuko ditu eginiko lanak deskribatzen dituen memoria, emaitzak eta ondorioak laburbiltzen dituzten taulak barne; horrez gain, esparruko eta laborategiko emaitza analitiko guztiak jasotzen dituzten eranskinak (azken horien txosten osoak gehituko dira) eta laginketa-puntuen kokapena plano takimetrikoan.

e) Aurreko atalean adierazitako obra-amaierako ziurtagiria eta horri erantsitako agiriak Ingurumen Sailburuordetzari aurkeztu beharko zaizkio, horrek onar ditzan. Aurkeztutako agiriak egokiak direla ikusi eta egiaztapen-bisita egin ondoren, ingurumen-organoak isurketaren jarduera etetea, zigilatzearen bukaera eta itxi ondorengo aldia abiatzea onartuko du.

G) Hondakin egonkortu eta solidotuen zabortegia itxi ondorengo baldintzak.

a) Cespa Conten, S.A. enpresa zabortegia ustiatzen duen erakundea den heinean, zabortegia itxi ondorengo mantentze-lanen eta kontrolaren arduraduna izango da, eta funtzio horietaz arduratuko den pertsonaren izena jakinarazi beharko dio ingurumen organoari.

b) Posta helbidea, telefonoa, faxa, posta elektronikoa edo edozein komunikabide eta kontaktu, edo itxiera ondorengo kontrolaz arduratuko den pertsona aldatuko balira, zabortegiaren titularrak jakinarazi egin beharko du.

c) Itxi ondorengo kontrola eta zainketa-aldia 30 urtekoa izango da, zabortegiaren jarduera eten eta zigilatzea bukatzean den data onartzen den unetik kontatzen hasita. Ingurumen-organoak hala irizten badio, data hori aldatu ahal izango da, itxi ondorengo kontroletan barrena lortutako emaitzen arabera. Itxi ondorengo aldiari dagokionez, sustatzaileak horrela eskatuta, ingurumen-organoak emandako ebazpenaren bidez ezarriko dira itxi ondorengo aldiaren bukaera eta horren inguruan ezarritako betebeharren epe-betetzea. Aldez aurretik atal honetan ezarritako baldintzak betetzen direla egiaztatu beharko da.

d) Cespa Conten, S.A. enpresak itxi ondorengo zainketak betetzeaz arduratuko den enpresa arduraduna izendatuko du. Enpresa hori zabortegiaren titularraren bestelakoa baldin bada, titularrak enpresa hori gutxienez urtebeteko aldirako izendatuko du. Izendapen horren berri eman beharko zaio ingurumen-organoari, izendapena egin eta 15 eguneko epean, eta zabortegiaren titularraren ordezkariaren onarpen-sinadura, itxi ondorengo zainketaz arduratuko den enpresako ordezkariaren onarpen-sinadura eta titularrak emandako agirien zerrenda xehatua barne izango ditu. Zerrendak aipatu zabortegiari dagozkion administrazio-eskakizun guztiak eta zigilatzean eta ordura arteko itxi ondorengo zainketan zehar sortutako agiri tekniko guztiak jaso beharko ditu.

e) Itxi ondorengo aldian zehar kokapenean jarduerak egin nahi izanez gero, aldez aurretik ingurumen-organoaren baimena izan beharko da. Nolanahi ere, ingurumen-organoaren aurrean ziurtatu beharko da jarduera horiek ez dietela eragiten zigilatzearen osotasunari, perimetro-kanalen jardunari, itxi ondorengo kontrol-sistemaren egonkortasunari edo elementuei, eta pertsonentzat arrisku onartezina ez dakartela.

Xede horretarako, zigilatzean sortzen den zuhaitz- edo zuhaixka-landaredia ezabatu egingo da.

Inolaz ere ez da baimenduko zabortegia itxi ondorengo fasean barrena zabortegiaren zigilatzea bizilekurako erabiltzea. Halaber, ez da baimenduko inolako jarduketarik zigilatze-segidako ur garbien drainatze-geruzaren gainazaletik 50 cm baino gutxiagora hurbil dadin.

H) Lan-arriskuen prebentziorako baldintzak.

Zabortegiaren ustiapen, zigilatze eta itxi ondorengo aldian barrena, ezbeharrak gertatzea saihesteko eta horien ondorioak mugatzeko beharrezko neurriak hartu beharko dira; bereziki, Lan-arriskuen Prebentziorako azaroaren 8ko 31/1995 Legea eta legea garatzen duten erregelamenduzko xedapenak aplikatuz.

I) Ingurumena zaintzeko programa.

Ingurumena Zaintzeko Programa sustatzaileak aurkeztutako agirietan aurreikusitakoaren eta ondoko atal hauetan ezarritakoaren arabera gauzatu beharko da:

I.1.– Uren eta efluente likidoen kalitate-kontrola:

a) Isuritako uraren kalitatearen kontrola, lurpeko uren kontrolari, lixibiatuen kontrolari, eta azaleko uren kontrolari dagokionez, sustatzaileak aurkeztutako agirietan aurreikusitakoari jarraituz burutu beharko da.

(Ikus .PDF)

b) Kanpoan egiten den kontrol bakoitza, laginak hartzea zein ondorengo analisia, «Erakunde Laguntzaile» batek (Jabari Publiko Hidraulikoaren Erregelamenduaren 255. artikuluan) egin eta egiaztatuko du, eta goian aipatutako parametro bakoitzaren gainean egingo dira. Sustatzaileak isurketa-puntu bakoitzeko lagin hartu berri baten analisia aurkeztu beharko du gutxienez; lagina 24 orduko ur-emariarekiko proportzionala izango da, edo bestela, lagin puntual esanguratsua.

Isurketen kontrolen emaitzak Ingurumen Sailburuordetzara bidaliko dira laginak hartzen direnetik hilabete bateko (1) epean.

c) Laginketak kutsatzaile gehien sortzen den aldietan egingo dira beti.

d) Isurketak baimenean jarritako baldintza guztiak betetzen dituela ulertuko da, E.2.3.3 atalean ageri diren parametro guztiek ezarritako mugak betetzen badituzte.

I.2.– Airearen kalitate-kontrola.

a) Atmosferara botatzen diren poluitzaileak kontrolatzea.

Zabortegiko gasaren neurketa tximinia guztien barnealdean egingo da. Neurtu beharreko parametroak, gutxienez, honakoak izango dira: CO, CO₂, N₂, O₂, H₂S eta CH₄, presio atmosferikoa eta airearen tenperatura, barnealdean neurtuko dira eta ustiapenean zehar hileroko maiztasunarekin.

Urtero, kanpo erakunde batek neurketa bat egingo du.

b) Inmisio atmosferikoen kontrola.

Airearen immisioa neurtzeko kanpainak egingo dira jardueraren ustiapenean zehar. Horretarako, sustatzaileak jarduerak inguruan duen eraginaren jarraipena egiteko proposamena landu eta Ingurumen Sailburuordetza honetan aurkeztuko du, bertan onartzeko. Proposamenak neurketa-gelen kokalekuen azterketa jasoko du, bai eta horien mantentze-lanen plana ere.

Laginketa-kanpaina horiek ahalik eta egoera okerrena duen aldean egingo dira. Lan-ingurunearen gaineko eragina baloratuko da, eragiketa eta lan guztietan, sarbideetan, isurketa-eremuan, etab. laginketa eginez.

I.3.– Zarataren kontrola.

Zarataren neurketa-kanpaina egingo da, Ebazpen honen E.2.6 atalean jasotako mugak betetzen direla ziurtatzearren.

I.4.– Isuri-ontziaren topografiaren kontrola (ustiapena, itxiera eta itxiera ondokoa).

Isuri-ontziaren topografiaren kontrola oinarrizko proiektuan jasotako proposamenaren arabera burutu beharko da, zehazki zaindu planaren txosten osagarriaren 10. atalean, Ingurumena Zaintzeko Planean. Kontrol topografiko horren emaitzek hauek jasoko dituzte: neurtzeko bitarteko eta materialak, gertatutako gorabeherak, aldi bateko bilakaeraren grafikoak, erregistratutako datuak euskarri elektronikoan (kalkulu-orria), eta horien interpretazioa.

Urtero zabortegiaren betetze-lanen plano topografiko eguneratu bat egin beharko da, zabortegiaren mugak, zabortegiaren zona zigilatua, eta azken urtean hondakinak utzi diren zabortegiaren zona zehaztuta dituena, eta horien azalerak eta zabortegiaren gainazalean aldaketak egin diren datak adierazita.

I.5.– Datu meteorologikoen bilketa.

Ustiapen-aldian eta zabortegia itxi ondorengoan, parametro meteorologikoen gaineko kontrola egingo da. Horretarako, Cespa Conten, S.A. enpresak biltegiko instalazioen eremuaren barruan kokatutako erregistro automatikoko plubiometroa izango du. Bildutako datuak Meteorologiako Euskal Zerbitzuko Amorebietako Estazio meteorologiko automatikokoekin osatuko dira.

Erregistro automatikoko plubiometroan prezipitazioa kontrolatuko da, eta estazio meteorologiko automatikoan, tenperatura, haizearen indarra eta norabidea, hezetasuna, presioa eta eguzki-erradiazioa.

I.6.– Zabortegiaren balantze hidrikoa.

Kanpoko erakunde batek urtero zabortegiaren balantze hidriko bat egin beharko du. Horretarako, Amorebietako estazioan erregistratutako lixibiatuen emariaren datuak eta erregistratutako datu meteorologikoak eta zabortegiaren gainazalean sortzen diren aldaketen plano topografikoak (zigilatutako eremuak, isurketarako eremuak, eta abar.) erabiliko dira. Tokiko oinarrizko datuak definitzeke dagoen lisimetro baten instalazioaren bidez kalkulatuko dira.

Itxi ondorengo aldiko lehen balantzeak zabortegiaren jarrera hidrodinamikoaren analisia barne izango du, erregistratutako emariaren eta eroankortasun elektrikoaren datuetatik eta itxi aurreko eta ondorengo balantze hidrikoaren alderaketatik abiatuta.

I.7.– Tresneriaren kontrola.

Urtero tresnen kontrolean espezializatutako enpresa batek txostena egingo du neurri zuzentzaileei buruz eta prozesuak eta ingurunearen kalitatea kontrolatzeko sistemei buruz.

I.8.– Jardueraren adierazleak.

Adierazleen inguruan, txosten bat egin eta Ingurumen Sailburuordetzari igorriko zaio. Txosten horretan jardueraren adierazleak kalkulatu eta kontrolatuko dira, sustatzaileak aurkeztutako 2007ko apirileko Ingurumeneko Baimen Bateratuaren eskabidearen dokumentazio gehigarrian dagoen proposamenaren arabera, eta zehazki, 2.1.9 Ingurumena Zaintzeko Programa atalean adierazten denaren arabera.

I.9.– Emaitzak kontrolatu eta bidaltzea.

Ingurumena zaintzeko programa osatzen duten analisi eta txostenen emaitzak behar bezala erregistratuko dira, eta Ingurumen Sailburuordetzara bidaliko dira. Ingurumena zaintzeko programaren emaitzak urtean behin bidaliko dira, beti martxoaren 30a baino lehen, ingurumenean aditua den erakunde aske batek egindako txostenarekin batera. Txosten horretan adieraziko dira neurri zuzentzaileen funtzionamendua, eta prozesuak eta ingurunearen kalitatea kontrolatzeko sistemak. Emaitzen analisia ere adieraziko da, eta bereziki aipatuko dira aldi horretan gertatu diren gorabehera garrantzitsuenak, horien ustezko arrazoiak eta konponbideak, eta baita laginketen xehetasunak ere, aurretik zehaztu ez baldin badira.

Halaber, zabortegian hondakinak uzteagatik urte horretan kobratuko diren prezioak jasoko ditu txostenak, hondakin mota edo taldeka xehatuta.

Honako hauek aurkeztu behar dira urtero:

a) bukatutako urteari dagokion balantze ekonomikoa, kontzeptuak xehatuz, bereziki aurreikusi gabekoak.

b) C) atalean aipatutako finantza-azterketaren eguneraketa. Bertan, diru-sarrerak, aurreikusitako obren gastuak, ustiaketa-gastuak, hala badagokio bermeen zenbatekoaren eguneraketa, eta abar jaso beharko dira. Horrela, justifikatuta egon behar da diru-sarrerek zabortegiaren instalazioa, ustiapena, zigilatzea eta itxi ondorengo mantentzetik sortutako gastuak estaliko dituztela.

c) Emaitza ekonomikoen arabera, zabortegiaren instalazioa, ustiapena, zigilatzea eta itxi ondorengo mantentzetik sortutako gastuak finantzatzeko helburua zein neurritan bete den adieraziko da, eta negatiboa izanez gero, hartu beharreko neurriak zehaztuko dira.

Publikoak ez diren zabortegien kasuan, ekitaldi bakoitzaren hasieran bermeen zenbatekoa eguneratu beharko da, kontsumoko prezioen indize (KPI) nazionala aplikatuz.

Halaber, hurrengo urtean egin beharreko obren eta hondakinek bete beharreko eremuen aurreikuspena gehituko da, gutxi gorabeherako kotak, aurreko urtean utzitako hondakinen bolumenaren kalkulua, soberakin-gaitasuna eta urte horretan utzitako hondakinen batez besteko dentsitatea adieraziz.

Isuritako uraren eta lurrazaleko eta lurrazpiko uren kalitatearen kontrolari buruzko emaitzak, gainera, hiru hilean behin bidaliko dira Uraren Euskal Agentziara (Mendebaldeko Kantaurialdeko Arroen Bulegoa).

I.10.– Ingurumena zaintzeko programaren agiri bategina.

Sustatzaileak ingurumena zaintzeko programaren agiri bategina landu beharko du, 2006ko abenduko ingurumeneko baimen bateratuaren eskabidearen dokumentazioan, 2007ko apirileko ingurumeneko baimen bateratuaren eskabidearen dokumentazio gehigarrian eta Ebazpen honetan proposatutako betekizunak bilduz. Programa horrek hauek zehaztu beharko ditu: kontrolatu beharreko parametroak, parametro bakoitzerako erreferentzia-mailak, analisi edo neurketen maiztasuna, laginketak edo analisiak egiteko teknikak, eta laginak hartzeko guneen kokapen xehatua. Halaber, dagokion aurrekontua ere barne hartu beharko du.

Era berean, ingurumena zaintzeko programak jardueraren adierazleak zehaztu eta adierazle horiek aztertzeko sistematika barruan izan beharko du, horien arabera enpresan bertan ingurumen-hobekuntza ziurtatzearren ezarritako neurri eta mekanismoen eraginkortasuna egiaztatu ahal izateko (ingurumen-adierazleak).

J) Ezohiko egoeretarako prebentziozko neurriak eta jardunerako baldintzak.

J.1.– Jarduera etetea, itxi ondorengo aldia bukatuta.

Jarduera lege hauen aplikazio-esparrukoa da: lurzorua ez kutsatzeko eta kutsatutakoa garbitzeko otsailaren 4ko 1/2005 Legea (90.002 epigrafea «Metalen tratamendua eta estaldura»), eta kutsadura sor dezaketen jardueren zerrenda eta lurzoru kutsatuen adierazpenerako irizpide zein estandarrak ezartzen dituen urtarrilaren 14ko 9/2005 Errege Dekretua. Hori dela-eta, Cespa Conten, S.A. enpresak hasiera eman beharko dio lurzoruaren kalitatearen adierazpenerako prozedurari, gehienez ere bi hilabeteko epean, jarduera behin betiko uzten duenetik kontatzen hasita, otsailaren 4ko 1/2005 Legeak 17.4 artikuluan xedatutakoaren arabera.

J.2.– Ezohiko jardunean aplikatzeko neurriak eta jarduerak.

Oinarrizko Proiektuan egindako proposamenean ezohiko egoeretan aplikatu beharreko prebentziozko neurriak eta jardunerako baldintzak zehazten dira. Horiez gain, ondorengo ataletan aipatzen diren baldintzak bete behar dira:

a) Ustiapenari buruzko eskuliburua eduki beharko da instalazioen egoera bermatzeko, batez ere ustekabeko jario edo ihesak daudenean kutsadura ekiditeko eskuragarri dauden baliabideei eta ezarritako segurtasun-neurriei dagokienez. Isuri-ihesak daudenean lurzorua babesteko hartu beharreko neurriak zehaztuko dira, eta zehatz adieraziko da hauei dagokien guztia: eraikuntzako materialak (iragazgaiztea), biltegiratzeko neurri bereziak (gai arriskutsuak), egon daitezkeen isuri-ihesak antzemateko neurriak edo gainbetetzerako alarma-sistemak, lantegiko kolektore-sarea zaindu eta garbitzekoak (sistematikoki garbitzeko beharra, maiztasuna, garbiketa mota), eta lurzoruaren gaineko isuriak biltzeko sistemak.

b) Hondakinak, olioak eta erregaia, besteak beste, maneiatzeak lurzorua eta ura kutsa dezake. Beraz, isuriak, jarioak edo ihesak gertatzeko arriskua izan dezaketen azalera guztiak irazgaiztuko dira.

c) Prebentziozko mantentze-lanen eskuliburu horretan kutsadura atmosferikoa prebenitzeko eta zuzentzeko sistemen (arazketa, minimizazioa, etab.) egoera ona bermatzeko neurriak jaso beharko dira.

d) Era berean, erregistro bat eduki behar da, eta bertan, aldizka egindako mantentze-lanen berri eman behar da, baita antzemandako gorabeherena ere.

e) Zabortegiaren perimetro-itxitura baldintza onetan mantenduko da.

f) Jarduerak eskatzen dituen materia lagungarri eta erregaiak horiek ingurunera hedatzea galaraziko duten baldintzetan biltegiratuko dira.

g) Larrialdi-egoera sortzen denean, berehala eta eraginkortasunez jarduteko behar beste material eduki behar da: berriro ontziratzeko erreserbako edukiontziak, beharrezkoa izanez gero; gerta daitezkeen isuriei eusteko produktu xurgatzaile selektiboak, segurtasuneko edukiontziak, hesiak eta kaltetutako ingurunea isolatzeko seinaleztapen-elementuak eta babes pertsonalerako ekipamendu bereziak.

h) Ingurumen Sailburuordetzara bidaliko da kubetak husteko eragiketak kontrolatzeko protokolo edo agiri bidezko prozedura; eraginkortasunean eragin dezaketen produktuen jarioak ez dira tratamenduko instalaziora eramango.

i) Andel edo putzuen hondoan pilatzen diren solidoak ez dira ibilgura hustuko aldizkako garbitze-lanetan zehar; behar bezala kudeatuko dira edo zabortegi baimendura eramango dira.

j) Arazte-prozesuan pilatutako hondakin solidoak eta lohiak aldizka aterako dira instalazioa behar bezala ibil dadin. Behar izanez gero, gordailu iragazgaitzetan eta hondoan hustubiderik ez dutenetan gordeko dira.

k) Inoiz ez dira pilatuko euri-uren jariatzearen ondorioz ibilgu publikoko ura kutsatzeko arriskua egon daitekeen guneetan.

l) Lohiak tratatzeko sistemako hondakin-ura arazteko instalazioaren sarrerara eramango da, han tratatzeko.

m) Hobi septikoaren sistemak garbitze- eta mantentze-lan egokia izango du errendimendu ona ziurtatzeko. Aldizka enpresa espezializatu batek erretiratuko ditu pilatutako solido eta lohiak, eta garbiketan arrastatutako solidoak ibilgura hustea saihestuko da.

n) Urtean behin instalazio horien garbiketaren eta mantentze-lanen fakturaren kopia bat bidaliko da.

o) Larrialdi-egoeretan, babes zibileko legeriari helduko zaio, eta bertan ezarritako betekizun guzti-guztiak bete beharko dira.

p) Titularrak beharrezkoak dituen bitartekoak edukiko ditu arazketa-instalazioak behar den bezala ustiatzeko eta ustekabeko isurketak edo isurtze atmosferikoak prebenitzeko hartu diren segurtasun-neurriak une oro erabilgarri edukitzeko. Kasu horretan, honako baldintza hauek azpimarratu behar dira:

Berme-neurri gisa, pH eta redox-aren zunda bikoitza eduki behar da, eta arazte-prozesuko puntu kritikoetan izaten diren kontsigna-puntuen desbideratzeei dagozkien alarmak jarri.

Araztegia ustiatzeko enpresa espezializatu batek egindako protokolo edo eskuliburu bat izango da nahitaez, eta ekipo elektromekaniko, zunda, mintz, dosifikatu eta kontrolatzeko tresna eta abarren azterketa eta mantentze-lanak finkatuko dira bertan.

Hondakin-ura ezingo da «by pass» bidez isuri arazketa-instalazioetan.

q) Ingurunearen edo jardueraren kontrolaren gainean kalteak eragin ditzakeen gorabehera edo ezohiko gertaeraren baten aurrean (besteak beste, ustekabeko isuria, isurtzeko muga-balioak gainditzea, edo zabortegiaren zigilatzearen edo itxi ondorengo sistemaren elementuren baten funtzionamenduari edo integritateari eragin diezaiokeen beste edozein), Cespa Conten, S.A. enpresak gorabehera edo ezohiko gertaera horren berri eman beharko dio Ingurumen Sailburuordetzari.

r) Gertakari edo arazo larriren bat edo ustekabeko isuriren bat egonez gero, SOS Deiak eta Udalari ere jakinarazi beharko zaie berehala. Ondoren, eta gehienez ere 48 orduko epean, ezbeharrari buruzko txosten xehatua bidaliko zaio Ingurumen Sailburuordetzari. Txosten horretan, gutxienez, datu hauek agertuko dira:

– Gertakari-mota.

– Gertakaria non, zergatik eta zer ordutan gertatu zen.

– Iraupena.

– Ustekabeko isuria bada, emaria eta isuritako gaiak.

– Mugak gaindituz gero, isurtzeei buruzko datuak.

– Eragindako kalteen balioespena.

– Hartutako neurri zuzentzaileak.

– Berriro gerta ez dadin aurreikusitako neurriak.

– Prebentziozko neurriak eraginkortasunez aplikatzeko ezarritako epeak.

s) Instalazioek suteen aurkako babesari buruz indarrean dagoen araudian ezarritako betekizunak betetzen dituztela egiaztatu beharko da. Egiaztapen hori egiteko, Ingurumen Sailburuordetza honi aurkeztuko zaizkio eskumena duten erakundeek emandako egiaztagiriak.

K) Baldin eta arautegi berria indarrean sartzeak, edo barneratzen diren sistemen egitura eta funtzionamenduari buruzko ezagutza berri esanguratsuetara egokitu beharrak hori egitea gomendatzen badute, neurri babesle zein zuzentzaileak eta ingurumena zaintzeko programa aldarazi ahal izango dira, bai neurtu behar diren parametroen kasuan, bai neurketaren aldizkakotasuna eta aipatutako parametroek hartu behar duten tarteari dagozkion mugen kasuan. Era berean, neurri babesle zein zuzentzaileak eta ingurumena zaintzeko programa jardueraren sustatzaileak hala eskatuta edo ofizioz aldaraz daitezke, ingurumena zaintzeko programan lortutako emaitzetan oinarrituta.

L) Urtean behin Cespa Conten, S.A. enpresak Ingurumen Sailburuordetzari jakinaraziko dizkio atmosferara eta uretara egindako isurtzeei eta sortu dituen hondakinei buruzko datuak, E-PRTR-Euskadi, botatako eta eskualdatutako kutsagarrien Europako Inbentarioa landu eta eguneratzeko, apirilaren 20ko 508/2007 Errege Dekretuaren, E-PRTR Araudiko eta ingurumeneko baimen bateratuetako isurketen gaineko informazioa ematea arautzen duenari jarraituz.

Informazio hori ekitaldi horren hurrengo martxoaren 31 baino lehen bidali beharko da. Informazioa Ingurumenari buruzko Adierazpenaren (IA) bidez gauzatuko da, hori baita kanpoko erakundeek eta Ingurumen eta Lurralde Antolamendu Sailak ingurumen-informazioa batak besteari elektronikoki emateko ardatza. Informazio-trukaketa horren funtsa Ingurumenari buruzko Adierazpenari (IA) dagozkion ingurumeneko datu teknikoak eta prozedurakoak sartzean datza, IKS-L03 Sistemako erakundeentzako bertsioaren bidez (www.eper-euskadi.net web-orrian eskuragarri): Ingurumen eta Lurralde Antolamendu Saileko Ingurumen-informazioa Kudeatzeko Sistema. Datu horiek guztiek Ingurumenean Eragina duten Jardueren Euskal Autonomia Erkidegoko Erregistroa osatuko dute, Europako Ingurumen Agentziaren Erregistrora (Europako E-PRTR Erregistroa) egiten diren informazio-bidalketen oinarri dena.

Halaber, Ebazpen honetan aurreikusitako gainerako informazio-trukeak aipatutako Ingurumenari buruzko Adierazpenaren bidez gauzatuko dira, ahal izanez gero.

Informazio hori agerikoa izango da, uztailaren 18ko 27/2006 Legearen xedapenekin bat etorriz. Lege horren bidez informazioa eskuragarri izateko, herritarren partaidetzarako eta ingurumen-gaietan justizia eskura izateko eskubideak arautzen dira (2003/4/EE eta 2003/2005/EE Zuzentarauak jasotzen ditu). Horrez gain, uneoro bermatu beharko da datu pertsonalak babesteko abenduaren 13ko 15/1999 Lege Organikoan ezarritakoa betetzen dela.

M) Ingurumeneko baimen bateratu honen eraginpeko instalazioan egindako aldaketek bat etorri beharko dute kutsaduraren prebentzio eta kontrol integratuari buruzko uztailaren 1eko 16/2002 Legeak 10.3 artikuluan ezarritako komunikazio-erregimenarekin. Hori horrela, ingurumeneko beste baimen bateratu bat beharko da aldaketak funtsezkoak direnean.

Halaber, proiektua aldatu edo zabaltzen bada, Euskal Herriko ingurumena babesteko otsailaren 27ko 3/1998 Lege Orokorraren 50. artikuluak jasotakoa beteko da, horien ingurumenaren gaineko eraginaren banakako ebaluazioaren prozedurari dagokionez, baldin eta aldaketa edo zabalkuntza horiek ingurumenean kalte handiak eragiteko arriskua baldin badago.

Hirugarrena.– Ebazpen hau eraginkorra izan dadin, aurretik Ingurumen Sailburuordetzari agiri bidez egiaztatu beharko zaio Ebazpen honetako bigarren ataleko puntu hauetan ezarritako baldintzak betetzen direla: A) (erantzukizun zibileko asegurua); B) (fidantza); C) (finantza-azterketa); E.2.4.1.e) (Hondakin arriskutsuak onartzen dituen agiria); E.2.4.1.k) (Hondakin arriskutsuen erregistro-eredua); E.2.4.2.d) (Hondakin ez-arriskutsuak onartzen dituen agiria); E.2.4.2.f) (Hondakin ez-arriskutsuen erregistro-eredua); E.2.5 (lurzoruaren kalitatea babesteko neurrien prozedurak); E.2.8 (Gasen karakterizazioaren analisia); I.5 (Erregistro automatikoko plubiometroa); I.10 (Ingurumena zaintzeko programaren agiri bategina); J.2.a) (Ustiapenari buruzko eskuliburua); J.2.g) (Larrialdietan berehala jarduteko dagoen materialaren ezaugarriak eta kuantifikazioa); J.2.s) (Suteen aurkako babesaren araudia betetzearen ziurtagiria); eta gainera, betetzea aurreikusita dauden eta Ebazpen honetako dagokien atal desberdinetan baimendutako edo eskatutako obra edo instalazioak betetzeko epeen berariazko Adierazpena aurkeztu beharko da.

Halaber, baimen hau indarrean jarri aurretik, ingurumen organo honi atxikitako zerbitzu teknikoen ikuskaritza-bisitan egiaztatu beharko da instalazioak aurkeztutako proiektuaren arabera eta Ebazpen honetan ezarritakoarekin bat etorrita eraiki direla. Bisita egunetik kontatzen hasita, hilabeteko epea izango du txosten bat egiteko. Betearazteke dauden obra edo instalazioei dagokienez, sustatzaileak horiek betearazteko aurreikusitako epea adieraziko du. Ingurumeneko baimen bateratuaren eraginkortasuna epe hori betetzearen menpe egon daiteke.

Goiko baldintza horiek guztiak betetzeko 6 hilabeteko epea ezarri da, ingurumeneko baimen bateratua eraginkorra dela adierazteko Ingurumen Sailburuordetzak emandako Ebazpen hau jakinarazten den egunetik kontatzen hasita.

Adierazitako baldintzak betetzen direla ziurtatzean, ebazpena emango da eta, horren bitartez, ingurumeneko baimen bateratua eraginkortzat aitortuko da.

Laugarrena.– Ingurumeneko baimen bateratu hau 8 urteko epean egongo da indarrean, aurreko atalean ezarritakoaren arabera ondorioak dauzkan egunetik kontatzen hasita. Epe hori igarota, baimena berritu egin beharko da eta, hala badagokio, jarraian datozen aldietarako eguneratu.

Ingurumeneko baimen bateratua amaitu baino hamar hilabete lehenago, titularrak baimena berritzeko eskaera egin beharko du, uztailaren 1eko 16/2002 Legearen 25. artikuluan xedatutakoa betez.

Bosgarrena.– Edonola ere, ingurumeneko baimen bateratua ofizioz aldatu ahal izango da uztailaren 1eko 16/2002 Legearen 26. artikuluan ezarritako kasuak aintzat hartuta.

Seigarrena.– Cespa Conten, S.A. enpresak Ebazpen honen xede den hondakin egonkortu eta solidotuen biltegi kontrolatuari dagokion titulartasun-aldaketarik eginez gero, aldaketa hori Ingurumen Sailburuordetzan jakinarazi beharko du, hark onar dezan. Edonola ere, zabortegiak eta bere instalazio osagarriek okupatutako lursailaren titulartasuna igortzen bada edo hori edukitzea bertan behera uzten bada, Ebazpen honetan aurreikusitako betebeharrak betetzen jarraitu beharko da. Edozein titulartasun-aldaketarik eginez gero (salmenta, lagapena, etab.) aldaketa hori ingurumen organoari jakinarazi beharko zaio, formalizazioa egin eta hilabeteko epea baino lehen, eta ingurumen organoak dagokion ebazpena igorriz aipatu aldaketa agirien bidez onartu behar du.

Zazpigarrena.– Baimen honek balioa galduko du kausa hauek gertatzen direnean:

– Epearen barruan ez egiaztatzea Ebazpen honetako hirugarren atalean ingurumeneko baimen bateratuak ondorioak izan ditzan ezarritako baldintzak betetzen direla, interesdunak behar bezala justifikatuz epea luzatzeko eskatzen ez badu.

– Cespa Conten, S.A. enpresaren nortasun juridikoa bukatzea, indarrean dagoen araudian ezarritako kasuetan.

– Baimena indarrean jartzen dela adierazten duen ebazpenean xedatutakoak.

Zortzigarrena.– Ebazpen honen edukia jakinaraztea Cespa Conten, S.A. enpresari, Larrabetzuko Udalari, ingurumeneko baimen bateratua emateko prozeduran parte hartu duten erakundeei, eta gainerako interesdunei.

Bederatzigarrena.– Ebazpen hau Euskal Herriko Agintaritzaren Aldizkarian argitaratzeko agintzea.

Hamargarrena.– Ebazpen honek ez du agortzen administrazio-bidea; horrenbestez, interesdunek gora jotzeko errekurtsoa aurkez diezaiokete Ingurumen eta Lurralde Antolamenduko sailburuari, hilabeteko epean, ebazpen hau jakinarazi eta hurrengo egunean kontatzen hasita, hori guztia Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 114. artikuluarekin eta ondorengoekin bat etorriz (urtarrilaren 13ko 4/1999 Legeak aldatu zuen lege hori).

Vitoria-Gasteiz, 2008ko apirilaren 30a.

Ingurumeneko sailburuordea,

IBON GALARRAGA GALLASTEGUI.

I. ERANSKINA

HONDAKINAK ONARTZEKO ZERRENDA

(Ikus .PDF)

II. ERANSKINA

ZABORTEGIAN AMIANTOA DUTEN HONDAKINAK ONARTZEKO ARTEZPIDEAK

Amiantoa duten eraikuntza-hondakinak onartu aurretik, horien titularrari onarpena ziurtatzen duen agiria igorriko zaio. Agiri horretan aipatu onarpenaren baldintzak zehaztuko dira. Ontziratu eta etiketatzeko baldintzak honakoak izango dira:

– Beren dimentsio handienean 1,5 m baino txikiagoak diren zuntz-zementuzko xafla, arbel eta piezen plano osoak, palet erretraktil eta zumiztutan modu ordenatuan joan behar dira, bloke trinkoa osatuz eta plastikozko film bikoitzean lotu eta bilduta (gutxieneko galga 400), hausturagatik elementurik galdu edo zatirik aska ez dadin.

– Beren dimentsio handienean 1,5 m baino handiagoak diren zuntz-zementuzko xafla, arbel eta piezen plano osoak, paketetan multzokatuta joan behar dira erretraktil eta zumiztuta, bloke trinko eta autosostengatzailea osatuz eta plastikozko film bikoitzean lotu eta bilduta (gutxieneko galga 400).

– Aurreko bi ataletan adierazitako zuntz-zementuzko piezen atal edo zatiak, bai eta egiturazko amiantoa duten beste pieza batzuk ere («konpositeak»), ez zuntz-zementuzkoak, besteak beste, zapatak, zirrindolak, etab. zaku itxietan ontziratu behar dira (big-bag iragazgaitzak), beren dimentsio handiena 0,5 m baino handiagoa denean eta zaku edo DOT motako PE-ko bidoietan itxita beren dimentsio handiena 0,5 m baino txikiagoa denean.

– Amianto zurrunezko molde eta mastika osoak edo zatituak euste bikoitzeko sistemetan bildu behar dira, pareta bikoitzeko zaku (big-bag) itxi eta zigilatuetan, zein barne-poltsa PE zigilatua duten DOT motako PE bidoi itxietan.

– Isolamendu-panelak eta estaltze-tapakiak, bai eta asbestodun hondakinak manipulatzean erabilitako materiala ere, pareta bikoitzeko zaku (big-bag) itxi eta zigilatuak bezalako euste bikoitzeko sistema iragazgaitzetan bildu behar dira.

Ontzi edo paketeen kasu guztietan, zuzen etiketatuak egon behar dute 1984ko urriaren 31ko Ministro Aginduko 11 eta 12. artikuluen arabera. Zehazki, «Material honek amianto-zuntzak ditu» adieraziko da.

Onartu eta hartzeko baldintzak.

Kamioia isurketa-ontzira iristen denean, horiek hartzearen ardura duen pertsonak honako aldeak egiaztatuko ditu:

– Kamioiak berak igotze eta karga-sistema duela (garabi-besoa edo jasogailua eta transpaleta), karga estaltzeko olana duela eta garraiatzailea hondakin arriskutsuak garraiatzeko erregistroan dagoela egiaztatuko du.

– DSCa igorritako onespen- edo inertizazio-agiriekin bat datorrela.

Biltegiaren ustiapenaren arduradunak, halaber, honakoak egiaztatuko ditu:

– Hondakina modu egokian jarria, bildua eta etiketatua dagoela, ontzi edo paketeetatik kanpo hauts edo zuntzen hondarrik gabe.

Egiaztatze-lan horien ondorioa baikorra bada, hartze-arduradunak hondakina onartuko du eta ustiapen-arduradunak amiantoa duten hondakinak uzteko erabiliko den biltegiko eremura joateko aginduko dio kamioiari.

Ez-betetze larriak badaude (gaizki ontziratua, agiriak ez izatea, deskarga egiteko baliabide gabezia, etab.), hartze-arduradunak kamioia onartzeari uko egin diezaioke DSCan uko egite horren arrazoiak adieraziz.

Deskarga baldintzak.

Ontzi edo paketeak banan-banan deskargatuko dira garabi-besoaren edo kamioiaren plataforma mekanikoaren bidez, ustiapen-arduradunaren azalpenen arabera eta adierazten zaion eremuko lursailean jarriko dira. Inola ere ez da onartuko ontziak edo paketeak iraulkiaz deskargatzea.

Deskargan ari diren langile guztiek norbera babesteko ekipamenduak (NBE) izan eta erabiliko dituzte.

Biltegiratze baldintzak.

Ohiko baldintzetan hondakinaren ontziak zuzenean aurretik prestatutako zulo edo zangan utziko dira. Zakuak tumuluak osatuz utziko dira eta ondoren lurrez edo beste hondakin batzuez osaturiko geruzarekin estaliko dira, beti ere, puntzonamenduz zakuak hauts ditzaketen ertz askodun materialak ez badituzte.

Baldintza jakin batzuetan, hondakinaren ontziak behin behineko biltegiratze-eremu batean jarri ahal izango dira. Handik, beranduago, zulo edo zangara garraiatu ahal izango dira. Kasu horretan, hondakinak ezingo du inoiz jardunaldia amaitzen den orduan lurperatu gabe egon, biltegia itxita dagoen orduetan inongo gertakari edo istripurik gerta ez dadin.

Urtero, zabortegiaren plano batean amiantoa duten hondakinak isuri diren eremua mugatuko da, isurketa-eremu horren goiko eta beheko kotak adieraziz. Aipatu planoaren kopia bat urtero bidaliko zaio ingurumen-organo honi, zabortegian sartu diren amiantodun hondakinei dagokien ondoko informazioarekin batera, honela xehatua:

– Jatorria (obra).

– Plakak desmuntatu dituen enpresa.

– Hondakin-kopurua.

Zabortegiaren enpresa kudeatzaileak material horiek bildu diren eremuan bertan eraginak izan ditzaketen obrak ez egitea zainduko du, hala nola, hondeaketak, zundaketak edo putzuak.

Halaber, enpresak, dagokion organo eskudunaren aurrean, amiantoarekin lotutako arriskuen aurka langileen babeserako arloan indarrean dagoen legediak xedatutako baldintzak beteko ditu.

Azterketa dokumentala