Euskal Herriko Agintaritzaren Aldizkaria

244. zk., 2012ko abenduaren 18a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

GIPUZKOAKO FORU ALDUNDIA

5641

5/2012 FORU ARAUA, irailaren 28koa, Trakzio Mekanikoko Ibilgailuen gaineko Zergaren uztailaren 5eko 14/1989 Foru Araua aldatzeari buruzkoa.

GIPUZKOAKO DIPUTATU NAGUSIA naizen honek

Jakinarazten dut Gipuzkoako Batzar Nagusiek onartu dutela «Irailaren 28ko 5/2012 Foru Araua, Trakzio Mekanikoko Ibilgailuen gaineko Zergaren uztailaren 5eko 14/1989 Foru Araua aldatzeari buruzkoa» eta nik aldarrikatu eta argitara dadin agintzen dut, aplikagarria zaien herritar guztiek, partikular nahiz agintari, bete eta betearazi dezaten.

Donostia, 2012ko irailaren 28a.

Diputatu nagusia,

Martin Garitano Larrañaga.

HITZAURREA

Foru-araugintzaren alorrean, trakzio mekanikoko ibilgailuen gaineko zergaren 14/1989 Foru Arauari esker, udalerriek hobari ezberdinak ezar ditzakete beren ordenantzetan, ibilgailuen ezaugarrien eta horiek ingurumenean eta biosfera osatzen duten elementuetan duten eraginaren arabera.

Gaur egun, hobari hori % 75era bitartekoa da, eta egokia dirudi motor elektrikoa duten ibilgailuen kasuan % 95era bitartekoa ezarri ahal izatea; izan ere, garraioak ingurumenean oro har duen inpaktuan horiek eragiten duten hobekuntza handia da; gainera, hobariok ezarrita, mota horretako teknologia iraunkorretan arrakastaz lanean ari diren sektore teknologiko berritzaileak sustatzen dira.

Proposamena gutxiago kutsatzen duten garraio-moduak sustatzeko politika aktiboan oinarritzen da, klima-aldaketaren arazoaren aurkako erakundeen borrokaren testuinguruan, eta garraio-teknologia iraunkorrei aplikatutako berrikuntza gure testuinguru hurbilagoan modu positiboan sustatu eta laguntzeko neurri bat da.

Artikulu bakarra.– Aldatzen da Trakzio Mekanikozko Ibilgailuen gaineko Zergaren uztailaren 5eko 14/1989 Foru Arauaren 4. artikuluko 5 apartatuaren b) hizkia, eta honela gelditzen da idatzita:

«b) % 75era bitarteko hobaria, ibilgailuen motorren ezaugarrien arabera eta horiek ingurugiroan duten eraginaren arabera.

Hobari hau % 95era arte irits daiteke, motor elektrikoa duten ibilgailuen kasuan.

Baldin eta udalerritik 100 milia baino gertuago ibilgailu elektrikoen 3 fabrikatzaile baino gehiago badaude, % 95eko hobaria aipatutako 100 miliako mugan fabrikatutako ibilgailuei bakarrik aplikatuko zaie».

AZKEN XEDAPENA

Foru arau hau Gipuzkoako Aldizkari Ofizialean argitaratu eta hurrengo egunean jarriko da indarrean.

Azterketa dokumentala