Egoitza elektronikoa

Kontsulta

Kontsulta erraza

Zerbitzuak


Azken aldizkaria RSS

Euskal Herriko Agintaritzaren Aldizkaria

83. zk., 2015eko maiatzaren 7a, osteguna


Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

EKONOMIAREN GARAPEN ETA LEHIAKORTASUN SAILA
1984

EBAZPENA, 2015eko martxoaren 31koa, Energiaren, Meategien eta Industria Administrazioaren zuzendariarena, zeinaren bidez Ingeniería de Gestión Industrial, S.L. sozietateari erakunde baimenduaren izendapena zabaltzen baitzaio, sonometroen, kalibragailu akustikoen eta dosimetroen egiaztapen metrologikoak egiteko.

Erref: 01-OV-1005

AURREKARIAK

1.– 2015eko martxoaren 6an, Ingeniería de Gestión Industrial, S.L. (INGEIN) enpresaren izenean eta ordez José Antonio Sanchez Chacón jaunak honetarako izendapena zabaltzeko eskabidea aurkeztu du: sonometroen, kalibragailu akustikoen eta dosimetroen egiaztapen metrologikoak egiteko erakunde baimendua izateko izendapena. Enpresa horrek EAEn dauka merkataritza-helbidea, zehazki, hemen: Arabako Teknologi Parkea, Erakin Nagusia, Lumiere Anaien kaleko 1. solairua, Miñaoko 5. bulegoa.

2.– Energiaren, Meategien eta Industria Administrazioaren zuzendariaren 2014ko uztailaren 7ko Ebazpenaren bidez, erakunde baimenduaren izendapena berritu zitzaion Ingeniería de Gestión Industrial, S.L. enpresari, honako hauen egiaztapen metrologikoak egiteko: ibilgailuak erregai gisa erabiliko ez diren substantziez hornitzeko gailuak, pneumatikoetarako erabilera publikoko manometro analogiko eta elektronikoak, biskositate txikiko likidoetarako zisterna-kamioien neurketa-sistemak, tenperatura erregistratzeko tresnak eta termometroak, funtzionamendu ez-automatikoko pisatze-tresnak, erregai gisa erabiliko diren substantziez hornitzeko gailuak, gasolina darabilten ibilgailuen ihes-gasen igorpenak neurtzeko tresnak eta diesela darabilten ibilgailuen opakutasuna neurtzeko eta argiarekiko xurgapen-koefizientea zehazteko tresnak.

3.– 2013ko maiatzaren 10eko Ebazpenaren bidez, erakunde baimenduaren izendapena berritu zitzaion INGEIN enpresari, funtzionamendu ez-automatikoko pisatze-tresnen egiaztapen metrologikoak egiteko.

2012ko martxoaren 14ko Ebazpenaren bidez, erakunde baimenduaren izendapena eman zitzaion INGEIN enpresari ibilgailuak erregai gisa erabiliko ez diren substantziez hornitzeko gailuen eta manometro elektronikoen egiaztapen metrologikoak egiteko, eta izendapena berritu zitzaion biskositate txikiko likidoetarako zisterna-kamioien neurketa-sistemen egiaztapen metrologikoak egiteko.

2012ko urtarrilaren 26ko Ebazpenaren bidez, erakunde baimenduaren izendapena eman zitzaion INGEIN enpresari tenperatura erregistratzeko tresnen eta termometroen egiaztapen metrologikoak egiteko.

2010eko urriaren 26ko Ebazpenen bidez, erakunde baimenduaren izendapena eman zitzaion INGEIN enpresari honako hauen egiaztapen metrologikoak egiteko: erregai gisa erabiliko diren substantziez hornitzeko gailuak, pneumatikoetarako erabilera publikoko manometroak, gasolina darabilten ibilgailuen ihes-gasen igorpenak neurtzeko tresnak eta diesela darabilten ibilgailuen opakutasuna neurtzeko eta argiarekiko xurgapen-koefizientea zehazteko tresnak.

4.– Erakunde eskatzaileak, egiaztapen metrologikoak egiteko erakunde baimenduaren izendapena zabaltzeko, honako hauek bete beharko ditu: egiaztapen metrologikoak egiteko erakunde baimenduak izendatzeko azaroaren 26ko 1/2007 Zuzentaraua argitaratu duen Industriako Idazkaritza Nagusiaren 2007ko azaroaren 29ko Ebazpenean ezarritako baldintzak. Hartarako, ENACek emandako OC-I/167 akreditazio-ziurtagiria aurkeztu da, eskatutako tresnak jasotzen dituen 2014-12-12ko eranskin teknikoarekin batera (9. azt.); beraz, bidezkoa da izendapena zabaltzea.

Espediente hau ebazteko, beharrezkoa da honako hauek aintzat hartzea:

ZUZENBIDEKO OINARRIAK

1.– Euskal Autonomia Erkidegoan metrologia-kontrola gauzatzeko bitartekoak ezarri zituen 38/2001 Dekretuaren 11. artikuluan zehazten denaren arabera, industria alorrean eskumena duen organoak egiaztatze metrologikoa egiten duten erakundeak gaitu ahal izango ditu konponketaren nahiz aldaketen osteko eta aldizkako egiaztatzeak burutu ditzaten.

2.– Energiaren, Meategien eta Industria Administrazioaren zuzendariak du ebazpen hau emateko eskumena, Ekonomiaren Garapen eta Lehiakortasun Sailaren egitura organikoa eta funtzionala ezartzen dituen apirilaren 9ko 190/2013 Dekretuaren 13. artikuluan ezarritakoaren arabera (2013-04-24ko EHAA).

3.– Neurgailuen kontrol metrologikoa arautzen duen oinarrizko legeria hauek osatzen dute: Metrologiari buruzko 32/1994 Legeak, uztailaren 21eko 889/2006 Errege Dekretuak, neurgailuen gainean Estatuak egin beharreko kontrol metrologikoa arautzekoak, eta aipatutako 2007ko azaroaren 29ko Ebazpenak.

4.– Sustapen Ministerioaren 1999ko apirilaren 27ko Agindua, Estatuaren kontrol metrologikoa arautzen duena funtzionamendu ez-automatikoko pisatze-tresnei dagokienez.

5.– Agindua, 2004ko apirilaren 23koa, Industria, Merkataritza eta Turismoko sailburuarena, 3.000 kg-tik gorako gehieneko irismena duten funtzionamendu ez-automatikoko pisatze-tresnen egiaztapen-entitateak arautzen dituena.

6.– Konpresio bidez martxan jartzen diren motorrak (diesel) dituzten ibilgailuen ihes-gasen opakutasuna neurtzeko eta argiarekiko xurgapen-koefizientea zehazteko tresnen gaineko Estatuaren kontrol metrologikoa arautzen duen azaroaren 22ko ITC/3749/2006 Aginduak, entseguak, horien egikaritzea eta onartutako gehieneko akatsak zehazten ditu IV. eranskinean.

7.– Azaroaren 22ko ITC/3722/2006 Aginduak, txinparta bidez martxan jartzen diren motorrak (gasolina) dituzten ibilgailuen ihes-gasen igorpenak neurtzeko tresnen gaineko Estatuaren kontrol metrologikoa arautzen duenak, entseguak, horien egikaritzea eta onartutako gehieneko akatsak zehazten ditu II. eranskinean.

8.– 1995eko apirilaren 25eko Ministro Agindua, pneumatikoetarako erabilera publikoko manometroei aldizkako egiaztapenak eta konponketaren eta aldaketaren ondorengo egiaztapenak egiteko faseetako kontrol metrologikoa arautzen duena.

9.– ITC/3700/2006 agindua, azaroaren 22koa, motordun ibilgailuen pneumatikoen presioa neurtzeko predeterminazio-gailuak dituzten edo ez dituzten osagai elektronikoez erabat edo partzialki hornitutako manometroen gaineko Estatuaren kontrol metrologikoa arautzen duena.

10.– ITC/3720/2006 Aginduak, azaroaren 22koak, uraz bestelako likidoak neurtzeko sistemen (hornigailuen edo banagailuen) gaineko Estatuaren kontrol metrologikoa arautzen duenak, entseguak, horien egikaritzea eta onartutako gehieneko akatsak zehazten ditu III. eranskinean.

11.– Industria, Merkataritza eta Turismoko sailburuaren 2004ko apirilaren 26ko Agindua, zeinaren bidez arautu egiten baitira erregaiak eta erregai likidoak hornitzeko likidoak –uraz bestelakoak– eta ibilgailu automobilen pneumatikoetarako erabilera publikoko manometroak neurtzeko sistemak.

12.– ITC/3750/2006 Agindua, azaroaren 22koa, biskositate txikiko likidoetarako zisterna-kamioietako neurketa-sistemen gaineko Estatuaren kontrol metrologikoa arautzen duena.

13.– Agindua, 2008ko otsailaren 29koa, Industria, Merkataritza eta Turismoko sailburuarena, biskositate txikiko likidoetarako (<= 20 mPa.S) zisterna-kamioietako neurketa-sistemen titularren, konpontzaileen eta egiaztatze-erakundeen betebeharrak arautzen dituena.

14.– Industriako Idazkaritza Nagusiaren 2009ko uztailaren 15eko Ebazpena, azaroaren 22ko ITC/3750/2006 Aginduaren III. eranskina aldatzekoa.

15.– Azaroaren 22ko ITC/3701/2006 Agindua, tenperatura kontrolatuko produktuak garraiatzeko, biltegiratzeko, banatzeko eta kontrolatzeko tenperatura-erregistragailu eta termometroen metrologia-kontrola arautzen duena.

16.– ITC/360/2010 agindua, otsailaren 12koa, ibilgailu automobilak erregai gisa erabiltzen ez diren substantziez hornitzeko uraz bestelako likidoak neurtzeko sistemen (hornigailuak edo banagailuak) gaineko Estatuaren kontrol metrologikoa arautzen duena.

17.– 1998ko abenduaren 16ko Agindua, soinu entzungarriaren mailak neurtzera bideratutako tresnen gaineko Estatuaren kontrol metrologikoa arautzen duena.

18.– ITC/2845/2007 Aginduak, irailaren 25ekoak, tresnak jardunean dauden fasean Estatuak soinu entzungarria neurtzeko tresnen gainean eta kalibragailu akustikoen gainean gauzatu beharreko kontrol metrologikoa arautzen du, eta Agindu horren IV. eta V. eranskinetan, entseguak, entseguak gauzatzeko modua eta fase eta tresna bakoitzerako baimendutako gehieneko erroreak zehazten dira.

Adierazitako legezko aginduak eta aplikazio orokorreko gainerako xedapenak aztertu ondoren, eta Industria Zerbitzuko buruak proposatuta, honako hau

EBAZTEN DUT:

1.– Ingeniería de Gestión Industrial, S.L. enpresari izendapena zabaltzea (helbidea: Arabako Parke Teknologikoa, Eraikin Nagusia, Lumiere Anaien kalea, 1. solairua, 5. bulegoa, Miñao) honako tresna hauen egiaztapen metrologikorako baimendutako erakunde gisa:

– Sonometroak, kalibragailu akustikoak eta dosimetroak.

Horiek aurretiaz berritutakoei gehitu behar zaizkie:

– Pisatze-tresna ez-automatikoak, 0 kg-tik 200.000 kg-ra gehienez, I m 30 kg eta n 500.000 mota; II m 3.000 kg mota; III eta IIII m 200.000 kg mota.

– Uraz bestelako likidoak neurtzeko sistemak, erregai gisa erabiliak izatera bideratzen ez diren substantziekin automobilak hornitzera bideratuak; gutxieneko kantitatea: 1 l.

– Erabilera publikoko 0tik 17 bar-era bitarteko manometro analogikoak eta elektronikoak.

– Biskositate txikiko likidoak (<= 20 mPa.S) garraiatzeko zisterna-kamioietarako neurtze-sistemak (emariak presio atmosferikoan 20 l/min-etik 1.300 l/min-era bitarte direnean).

– 0.5, 1 eta 2 motako termometroak (-20 ºCtik 70 ºCra), in situ zein laborategian, bai eta 1 eta 2 motako (-20 ºCtik +70 ºCra) tenperatura-erregistragailuak ere, kanpoko edo barruko zundarekin, in situ eta laborategian.

– Erregai likidoetarako hornigailuak, 200 l/min bitarterainoko emariekin.

– Konpresio bidezko pizte-sistemadun motorrak (diesela) dituzten ibilgailuen ihes-gasen opakutasuna neurtzeko eta argi-xurgapenaren koefizientea zehazteko tresnak.

– Txinparta bidezko pizte-sistemadun motorrak (gasolina) dituzten ibilgailuen ihes-gasen isurketak neurtzeko tresnak.

Izendapen-zabaltze horren irismena ENACek emandako egiaztapenean jasotako tresnetan oinarrituta dago, OC-I/167 eranskin teknikoaren arabera (9. berrikuspena, 2014-12-12koa).

2.– Ematen den baimenari honako baldintza hauek ezartzea:

– Jardun-eremuak Euskal Autonomia Erkidegoko tresnak biltzen ditu.

– Tresnak probak gainditzen baditu, egiaztatu izanaren etiketa erantsiko dio erakundeak. Halaber, kontrol metrologikoko egiaztagiri bat emango da, Ekonomiaren Garapen eta Lehiakortasun Sailak ezartzen duenarekin bat etorriz.

Probak gainditzen ez baditu, zerbitzua emateko desgaituta dagoela adierazten duen etiketa gorria itsatsiko dio. Hori guztia, uztailaren 21eko 889/2006 Errege Dekretuaren I. eranskinarekin bat etorriz egingo da. Halaber, egiaztatzea gainditu ez duen tresnaren berri emango zaio, berehala, tresna dagoen lekuko lurralde-ordezkaritzari.

– Egiaztapena burututa, Ingeniería de Gestión Industrial, S.L. sozietateak tresna zigilatuko du zigiluen bidez edo, posible bada eta bortxaezintasuna bermatzen bada, etiketa itsasgarri auto-suntsigarrien bidez. Ez dira inolaz ere berunezko zigiluak edo antzekoak erabiliko; zigiluok jardueraren girorako egokiak eta iraunkorrak izan beharko dute. Kolore laranja erabili behar da, gainerakoak Administraziorako edo beste agente metrologiko batzuetarako gordetzen baitira. Espainiako Metrologia Zentroaren (CEM) eta Energiaren, Meategien eta Industria Administrazioaren Zuzendaritzaren gida eta gomendioei jarraitu beharko zaie.

Edonola ere, zigiluek inskripzio hauek izango dituzte:

a) Zigilu normala:

(Ikus .PDF)

b) Zigilu enbutitua:

(Ikus .PDF)

c) Plastikozko zigilua:

(Ikus .PDF)

Egiaztatzea egiten den urtearen azken bi digituei dagokio XX-a.

3.– Ingeniería de Gestión Industrial, S.L. sozietateak urtero emango dio zuzendaritza honi baimentzen diren entseguetarako ezartzen dituen tarifen berri.

4.– EAEko erakunde baimenduak erregistratzeari dagokionez, zenbaki hau ematen zaio Ingeniería de Gestión Industrial, S.L. sozietateari: 01-OV-1005.

5.– Ingeniería de Gestión Industrial, S.L. enpresak honako hauetan xedatutakoari jarraituko dio uneoro: neurketa-tresnen gaineko Estatuaren kontrol metrologikoa arautzen duen uztailaren 21eko 889/2006 Errege Dekretua, izendapen hau berritzeko oinarri juridikoetan adierazitako aginduak, eta 2007ko azaroaren 29ko Ebazpena, eta bai Jaurlaritzaren Ekonomia Garapen eta Lehiakortasun Saileko Energiaren, Meategien eta Industria Administrazioaren Zuzendaritzak ezarritako beste edozein xedapen ere.

6.– Izendapen-zabaltze hau 2018ko abenduaren 31n iraungiko da, eta, egun hori baino lehen, interesdunak beste zabaltze bat eskatu ahal izango du, 2007ko azaroaren 29ko Ebazpenean xedatutako baldintza guztiak betetzen baditu –egiaztapen metrologikoko erakunde baimenduak izendatzekoa–.

7.– Izendatutako erakundeak egindako jarduerak ikuskatzeko, esku hartzeko eta kontrolatzeko eskumena Energiaren, Meategien eta Industria Administrazioaren Zuzendaritzari dagokio, baita Eusko Jaurlaritzaren Ekonomia Garapen eta Lehiakortasun Saileko Arabako Lurralde Ordezkaritzari ere. Gainera, baimena ematea ahalbidetu zuten baldintzak betetzen jarraitzen duela egiaztatzeko ere, ikuskapenak egin ahal izango dira.

8.– Baimen honek ordeztu eta baliogabetu egiten ditu Ingeniería de Gestión Industrial, S.L.ri egiaztatze metrologikoak egiteko aurretik emandakoak.

9.– Ebazpen hau eman eta gero, aurkeztutako agirietan egiaztatutako egoera aldatzen bada, Energiaren, Meategien eta Industria Administrazioaren Zuzendaritzari jakinaraziko zaio, eta hark baimena berretsiko du edo deuseztatu ahal izango du.

10.– Dena den, bateraezintasuna eta independentzia egongo da kontrol metrologikoa jasan behar duten neurketa-tresnen ekoizpen-, merkaturatze- eta konpontze-jarduerekiko (zerbitzuak ematea barne, baita Energiaren, Meategien eta Industria Administrazioaren Zuzendaritzak adierazten dituen jarduerak ere).

11.– Baimen hau deuseztatzeko arrazoi izango dira, indarreko legerian aurreikusitakoez gain, bertan ezarritako baldintzak ez betetzea, akreditazioa etetea edo baliogabetzea, baita hura eman zen orduko inguruabarrak funtsean aldatzea ere.

12.– Izendapen hau ez berritzeko arrazoi izan daitezke arau- eta administrazio-irregulartasunak, baita egiaztatze metrologikoko erakunde baimendua zigortuta egotea ere.

13.– Urtero eta urtearen lehenengo hiruhilekoan, Egiaztatze Metrologikoko Erakunde Baimenduak memoria bat helaraziko die Energiaren, Meategien eta Industria Administrazioaren Zuzendaritzari eta Arabako Lurralde Ordezkaritzari, zeinetan burututako jarduerak eta jazo diren gorabeherak jasoko baitira. Halaber, lurralde bakoitzean egindako egiaztatzeen berri emango zaio dagokion ordezkaritzari, sei hilabetean behin.

Horretaz gain, 48 orduko aurrerapenarekin, jardun-esparruaren arabera dagokion lurralde-ordezkaritzan jakinaraziko du zein diren egin beharreko egiaztatzeak, mezu elektroniko edo fax bidez jakinarazi ere.

Ebazpen honek ez dio amaiera ematen administrazio-bideari, eta, beraren aurka, gora jotzeko errekurtsoa aurkez dakioke Industriako sailburuordeari, hilabeteko epean, ebazpen hau jakinarazi eta biharamunetik aurrera, 4/1999 Legean ezarritakoa betez. Lege horren bidez, azaroaren 26ko 30/1992 Legea aldatu zen, Herri Administrazioen Araubide Juridikoaren eta Administrazio Prozedura Erkidearena.

Vitoria-Gasteiz, 2015eko martxoaren 31.

Energiaren, Meategien eta Industria Administrazioaren zuzendaria,

JAVIER ZARRAONANDIA ZULOAGA.


Azterketa dokumentala