Euskal Herriko Agintaritzaren Aldizkaria

76. zk., 2015eko apirilaren 24a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

GIPUZKOAKO FORU ALDUNDIA

1849

5/2015 FORU ARAUA, apirilaren 7koa, Bidegi Gipuzkoako Azpiegituren Agentzia, S.A. foru sozietate publikoaren 2015eko finantza beharrak finantzatzeko kreditu gehigarria onartzekoa.

GIPUZKOAKO DIPUTATU NAGUSIAK

Jakinarazten dut Gipuzkoako Batzar Nagusiek onartu dutela «5/2015 Foru Araua, apirilaren 7koa, Bidegi Gipuzkoako Azpiegituren Agentzia, S.A. foru sozietate publikoaren 2015eko finantza beharrak finantzatzeko kreditu gehigarria onartzekoa»; eta nik aldarrikatu eta argitara dadin agintzen dut, aplikagarria zaien herritar guztiek, partikularrek nahiz agintariek, bete eta betearazi dezaten.

Donostia, 2015eko apirilaren 7a.

Diputatu Nagusia,

MARTIN GARITANO LARRAÑAGA.

HITZAURREA

Azpiegitura handiak egitera bideratuta zegoen aurreko kudeaketa ereduaren ondorioz, Bidegi, S.A. foru sozietate publikoaren karga finantzariok hazkunde esponentziala izan du. Hori dela eta, azken urteetan sozietate horrek egoera finantzario korapilatsu bati aurre egin behar izan dio, are gehiago 2015eko ekitaldian.

Zehazki, zorra ordaintzeko zerbitzuaren betebeharrak ugariak dira, hau da, interesak, eratorrien likidazioa eta maileguen amortizazioa, eta, horiekin batera, erreserba kontuek zuzkidurak izateko eskakizunak; izan ere, horiek guztiak Inbertsioen Europako Bankuaren kreditu sindikatu eta maileguen kontratuetatik eratorritakoak dira, hainbat finantza erakunderekin eta erakunde honekin 2011. urtean sinatutakoak. Horiek guztiak, ustez, sozietateak 2015. urtean kaxa garbia sortzeko dituen aukerak baino handiagoak izango dira (8,9 milioi euro).

Aurreikusitako kaxaren defizita zuzentzeko, kapitala gehitu egin behar da sozietatearen akzio handitze baten bidez, aipatutako zenbatekoa adinakoa izan behar duena.

Horretarako, 2015eko aurrekontu luzatuan kreditu gehigarri bat onartu behar da, kapital handitzea finantzatzeko eta, horrela, Bidegi, S.A. foru sozietate publikoak lurraldeko bide azpiegitura arloan egiten dituen jarduketei aurre egin ahal izateko.

1.– artikulua. Xedea.

Foru arau honen xedea da kreditu gehigarri bat onartzea Gipuzkoako Foru Aldundiaren 2015eko aurrekontu luzatuan, Bidegi Gipuzkoako Azpiegituren Agentzia SA sozietatearen kapitala handitzeko. Kreditu hori 8.900.000 eurokoa izango da.

2.– artikulua. Kreditu gehigarria.

Onartzen da 2015eko aurrekontu luzatuaren kreditu gehigarri bat, 8.900.000 eurokoa, kontu-sail honen kontura: 1 0801.010.850.00.00 2015 «Bidegi, S.A. Kapital handitzea 2015».

3.– artikulua. Kreditu gehigarriaren finantzaketa.

Foru arau honen bidez onartutako kreditu gehigarria finantzatuko da 2014ko abenduaren 31n finkatuta zegoen diruzaintza gerakinarekin, 2 0520.200.870.00.01 kontu-sailaren kontura –Gastu orokorren diruzaintza gerakina–. Kreditu gehigarria 8.900.000 eurokoa izango da.

4.– artikulua. Kreditu gehigarriaren exekuzioa.

Onartutako kreditu gehigarriaren xede den kapital handitzea eta dagozkion ordainketak Bidegi Gipuzkoako Azpiegituren Agentzia, S.A.ren finantza beharrek justifikatzen duten neurrian egingo dira.

Urtearen amaieran, Bidegiren ekitaldiko amaierako balantzeak konpentsatuko du gerakineko funtsen erabilera.

AMAIERAKO XEDAPENA.– Indarrean sartzea.

Foru arau hau Gipuzkoako Aldizkari Ofizialean argitaratzen den egun berean jarriko da indarrean.

Azterketa dokumentala