Euskal Herriko Agintaritzaren Aldizkaria

50. zk., 2015eko martxoaren 13a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

HERRI ADMINISTRAZIO ETA JUSTIZIA SAILA

1232

AGINDUA, 2015eko otsailaren 24koa, Herri Administrazio eta Justiziako sailburuarena, Fundación Cultural Privada Estadio Sociedad Deportiva fundazioaren estatutuetako 14., 15. eta 20. artikuluetan egindako aldaketak onartu eta Euskal Autonomia Erkidegoko Fundazioen Erregistroan inskribatzeko dena.

Ikusi eta aztertu da Euskal Autonomia Erkidegoko Fundazioen Erregistroan inskribatzeko egindako eskabidearen espedientea.

AURREKARIAK

Lehenengoa.– 2014ko abenduaren 17an, honako eskabide honi eman zitzaion sarrera Herri Administrazio eta Justizia Sailean: Fundación Cultural Privada Estadio Sociedad Deportiva fundazioaren Patronatuan eta estatutuen 14., 15. eta 20. artikuluetan egindako aldaketak Euskal Autonomia Erkidegoko Fundazioen Erregistroan inskribatzeko eskabidea, Fundazioaren Patronatuko lehendakari den Fernando Aranguiz Mingueza jaunak aurkeztua.

Eskabidearekin batera, aurkeztu zen Patronatua eta Batzorde Betearazlea aldatzearekin eta sozietatearen estatutuak aldatzearekin lotuta hartutako erabakiak jakinarazteko Eskritura Publikoaren kopia baimendua. Eskritura publiko hori 2014ko abenduaren 2an egiletsi zuen Fundazioaren Patronatuko idazkari den José Ignacio Besga Zuazola jaunak, Vitoria-Gasteizko Alfredo Pérez Ávila notarioaren aurrean (protokolo-zk.: 2.910).

Eskritura publiko horretan sartu zen José Ignacio Besga Zuazola jaunak –Fundazioko Patronatuko idazkari gisa, eta lehendakariaren oniritziarekin– 2014ko urriaren 27an Vitoria-Gasteizen emandako ziurtagiria, Patronatuak 2014ko ekainaren 12an eta urriaren 2an egindako bilerena, zeinetan, besteak beste, aho batez onartu baitzen Fundazioaren estatutuetako 14., 15. eta 20. artikuluak aldatzea.

Eskrituran, aldatutako artikuluen idazketa berria jasotzen da, osorik.

Bigarrena.– Euskal Autonomia Erkidegoko Fundazioen Erregistroko Zerbitzu Teknikoek, espedientea aztertu ondoren, erabaki-proposamena eman dute. Hona hemen horretarako kontuan hartu dituzten

ZUZENBIDEKO OINARRIAK

Lehenengoa.– Herri Administrazio eta Justiziako sailburuari dagokio fundazioaren estatutuak aldatzeko espedientea agindu bidez ebaztea. Hala ezarrita dago xedapen hauetan: Euskal Autonomia Erkidegoko Fundazioen Erregistroaren Erregelamendua onartzen duen ekainaren 19ko 101/2007 Dekretuaren 3.1 artikuluan; Euskal Autonomia Erkidegoko Fundazioen Babesletzaren Erregelamendua onartzen duen ekainaren 19ko 100/2007 Dekretuaren 4.1.a) artikuluan; Herri Administrazio eta Justizia Sailaren egitura organikoa eta funtzionala ezartzen duen apirilaren 9ko 188/2013 Dekretuan, eta Lehendakariaren abenduaren 15eko 20/2012 Dekretuan, Euskal Autonomia Erkidegoaren Administrazioko sailak sortu, ezabatu eta aldatzeko eta horien egitekoak eta jardun-arloak finkatzekoa.

Bigarrena.– Espediente honi funtsezko iritzitako datuak eta agiriak erantsi zaizkio, eta, bereziki, hauetan eskatutakoa bete da: Euskal Autonomia Erkidegoko Fundazioei buruzko ekainaren 17ko 12/1994 Legearen 31. artikuluan eta Euskal Autonomia Erkidegoko Fundazioen Erregistroaren Erregelamendua onartzen duen ekainaren 19ko 101/2007 Dekretuaren 44. artikuluan; aplikagarriak diren lege eta erregelamenduetan ezarritakoarekin bat dator aldaketa.

Ikusirik aipatutako manuak eta aplikagarriak diren gainerako arauak, honako hau

EBAZTEN DUT:

Lehenengoa.– Fundación Cultural Privada Estadio Sociedad Deportiva fundazioaren estatutuen 14., 15. eta 20. artikuluetan egindako aldaketak onartzea.

Bigarrena.– Fundazioaren estatutuen aldaketa hori inskribatzeko agintzea, agindu honen datarekin, eskritura publikoan ezarritakoaren arabera. Eskritura –han dago jasota zein artikulu aldatu diren– 2014ko abenduaren 2an egiletsi zuen Fundazioaren Patronatuko presidente José Ignacio Palenzuela Arrieta jaunak, Vitoria-Gasteizko notario den Alfredo Pérez Ávilaren aurrean (protokolo-zenbakia: 2.910).

Hirugarrena.– Agindu hau Euskal Herriko Agintaritzaren Aldizkarian argitaratzea eta interesdunei bidaltzea.

Agindu honek amaiera ematen dio administrazio-bideari, eta, beraren aurka, berraztertzeko errekurtsoa aurkeztu ahal izango zaio Herri Administrazio eta Justiziako sailburuari, hilabeteko epean, agindua jakinarazi eta biharamunetik aurrera; bestela, administrazioarekiko auzi-errekurtsoa aurkez daiteke Euskal Autonomia Erkidegoko Auzitegi Nagusiko Administrazioarekiko Auzietako Salan, bi hilabeteko epean, agindua jakinarazi eta biharamunetik.

Vitoria-Gasteiz, 2015eko otsailaren 24a.

Herri Administrazio eta Justiziako sailburua,

JOSU IŃAKI ERCORECA GERVASIO.

Azterketa dokumentala