Euskal Herriko Agintaritzaren Aldizkaria

32. zk., 2015eko otsailaren 17a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

HERRI ADMINISTRAZIO ETA JUSTIZIA SAILA

757

AGINDUA, 2015eko urtarrilaren 15ekoa, Herri Administrazio eta Justiziako sailburuarena, Fundacion Residencia San Miguel-Mikel Deuna Egoitza Fundazioaren estatutuetako 9. eta 10. artikuluetan egindako aldaketak onartu eta Euskal Autonomia Erkidegoko Fundazioen Erregistroan inskribatzeko dena.

Euskal Autonomia Erkidegoko Fundazioen Erregistroan inskribatzeko egindako eskabidearen espedientea ikusi eta aztertu da.

AURREKARIAK

Lehenengoa.– 2014ko maiatzaren 19an, honako eskabide honi eman zitzaion sarrera Herri Administrazio eta Justizia Sailean: Fundación Residencia San Miguel-Mikel Deuna Egoitza Fundazioaren Patronatuan eta estatutuen 9. eta 10. artikuluetan egindako aldaketak Euskal Autonomia Erkidegoko Fundazioen Erregistroan inskribatzeko eskabidea, Fundazioaren zuzendari Aintzane Urigüren Arana andreak aurkeztua.

Eskabidearekin batera, fundazioak Patronatuko kide bat kentzeko, estatutuak partez aldatzeko eta horren berri emateko hartutako erabakiak publiko egiteko eskritura publikoaren bi kopia baimendu aurkeztu ziren. Eskritura publiko hori 2014ko apirilaren 30ean egiletsi zuen José Ignacio Palenzuela Arrieta Patronatuko presidenteak, Elgoibarko Jorge Aramburu Soraluce notarioaren aurrean (protokolo zk.: 356).

Eskritura publiko horretan sartu zen Miren Josebe Pazos Urreizti-k –fundazioko idazkari gisa, eta lehendakariaren oniritziarekin– 2014ko apirilaren 30ean Mutrikun emandako ziurtagiria, Patronatuak 2013ko martxoaren 19an egindako bilerarena, zeinean, besteak beste, aho batez onartu baitzen Fundazioaren estatutuetako 9. eta 10. artikuluak aldatzea.

Eskrituran, aldatutako artikuluen idazketa berria jasotzen da, osorik.

Bigarrena.– 2014ko uztailaren 18ko idazki baten bidez, Fundazioen Erregistroak atzemandako hutsak zuzentzeko eskatu zion Fundazioari, eta 2014ko abenduaren 23an, Herri Administrazio eta Justizia Sailera iritsi zen 2014ko irailaren 18an Elgoibarko notario Jorge Aramburu Soraluce aurrean egiletsitako eskritura publikoaren bi kopia (protokolo-zenbakia: 761), aurretik emandako bestea zuzentzekoa.

Hirugarrena.– Euskal Autonomia Erkidegoko Fundazioen Erregistroaren Zerbitzu Teknikoek aztertu dute espedientea, eta ondoren, ebazpen-proposamena egin dute. Hona hemen horretarako kontuan hartu dituzten

ZUZENBIDEKO OINARRIAK

Lehenengoa.– Herri Administrazio eta Justiziako sailburuari dagokio fundazioaren estatutuak aldatzeko espedientea agindu bidez ebaztea. Hala ezarrita dago: Euskal Autonomia Erkidegoko Fundazioen Erregistroaren Erregelamendua onartzen duen ekainaren 19ko 101/2007 Dekretuaren 3.1 artikuluan; Euskal Autonomia Erkidegoko Fundazioen Babeslaritzaren Erregelamendua onartzen duen ekainaren 19ko 100/2007 Dekretuaren 4.1.a) artikuluan; Herri Administrazio eta Justizia Sailaren egitura organikoa eta funtzionala ezartzen duen apirilaren 9ko 188/2013 Dekretuan; eta Lehendakariaren abenduaren 15eko 20/2012 Dekretuan, Euskal Autonomia Erkidegoaren Administrazioko sailak sortu, ezabatu eta aldatzeko eta horien egitekoak eta jardun-arloak finkatzekoan.

Bigarrena.– Espediente honi funtsezko iritzitako datu eta agiriak erantsi zaizkio, eta bereziki, hauek: Euskal Autonomia Erkidegoko Fundazioei buruzko ekainaren 17ko 12/1994 Legearen 31. artikuluan eta Euskal Autonomia Erkidegoko Fundazioen Erregistroaren Erregelamendua onartzen duen ekainaren 19ko 101/2007 Dekretuaren 44. artikuluan eskatutakoak; eta aplikagarriak diren lege eta erregelamenduetan ezarritakoarekin bat dator aldaketa.

Aipatutako manuak eta aplikagarriak diren gainerako arauak ikusita honako hau

EBAZTEN DUT:

Lehenengoa.– Mikel Deuna Egoitza Fundazioaren estatutuen 9. eta 10. artikuluetan egindako aldaketak onartzea.

Bigarrena.– Fundazioaren estatutuen aldaketa hori inskribatzeko agintzea, agindu honen datarekin, eskritura publikoan ezarritakoaren arabera. Eskritura –han dago jasota zein artikulu aldatu diren– 2014ko apirilaren 30ean egiletsi zuen Fundazioaren Patronatuko presidente José Ignacio Palenzuela Arrieta jaunak, Elgoibarko notario Jorge Aramburu Soraluce jaunaren aurrean (protokolo-zenbakia: 356).

Hirugarrena.– Agindu hau Euskal Herriko Agintaritzaren Aldizkarian argitaratzea eta interesdunei bidaltzea.

Agindu honek amaiera ematen dio administrazio-bideari, eta, beronen aurka, aukerako berraztertzeko errekurtsoa aurkez dakioke Herri Administrazio eta Justiziako sailburuari, hilabeteko epean, agindua jakinarazi eta hurrengo egunetik hasita; bestela, administrazioarekiko auzi-errekurtsoa aurkez daiteke Euskal Autonomia Erkidegoko Auzitegi Nagusiko Administrazioarekiko Auzien Salan, bi hilabeteko epean, agindua jakinarazi eta hurrengo egunetik hasita.

Vitoria-Gasteiz, 2015eko urtarrilaren 15a.

Herri Administrazio eta Justiziako sailburua,

JOSU IÑAKI ERCORECA GERVASIO.

Azterketa dokumentala