Euskal Herriko Agintaritzaren Aldizkaria

21. zk., 2015eko otsailaren 2a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

GIPUZKOAKO FORU ALDUNDIA

458

19/2014 FORU ARAUA, abenduaren 23koa, aldatzen duena 2010eko ekainaren 15eko 4/2010 Foru Dekretu Araua, AP-1 eta AP-8 autobideak Gipuzkoako zatian 2010eko uztailaren 1etik aurrera erabiltzeko kanonak ezartzekoa.

GIPUZKOAKO DIPUTATU NAGUSIAK

Jakinarazten dut Gipuzkoako Batzar Nagusiek onartu dutela «19/2014 Foru Araua, abenduaren 23koa, aldatzen duena 2010eko ekainaren 15eko 4/2010 Foru Dekretu Araua, AP-1 eta AP-8 autobideak Gipuzkoako zatian 2010eko uztailaren 1etik aurrera erabiltzeko kanonak ezartzekoa»; eta nik aldarrikatu eta argitara dadin agintzen dut, aplikagarria zaien herritar guztiek, partikularrek nahiz agintariek, bete eta betearazi dezaten.

Donostia, 2014ko abenduaren 23a.

Diputatu nagusia,

MARTIN GARITANO LARRAÑAGA.

HITZAURREA

Bide azpiegiturak erabiltzeko kanona 2002ko urriaren 3ko 7/2002 Foru Arauaren bidez sortu eta arautu zen, eta haren ustiapena Bidegi Gipuzkoako Azpiegituren Agentzia, S.A. foru sozietate publikoari dagokio.

Foru arau horretan xedatutakoa betez, 2010eko ekainaren 15eko 4/2010 Foru Dekretu Arauaren bidez, finkatu ziren Gipuzkoako Lurralde Historikoan AP-8 eta AP-1 autobideak erabiltzeagatik 2010eko uztailaren 1etik aplikagarri ziren kanonaren zenbatekoak; zeinak urtean behin eguneratzen diren Gipuzkoako Lurralde Historikoko ekitaldi bakoitzeko aurrekontu orokorrak onartzerakoan.

Era berean, 4/2010 Foru Dekretu Arauaren 2. artikuluak aurreikusten du zenbait deskontu aplikatzea ibilgailu arinetako erabiltzaile diren pertsona fisikoek hilean egindako bidaia kopuruaren arabera, baldin eta hainbat baldintza betetzen badituzte.

Halaber, 3. artikuluan kenkari gehigarria aurreikusten da deskontu planari atxikitako erabiltzaileentzat, baldin eta Donostiako Bigarren Ingurabidearekin lotutako ibilbide batzuetan 24 orduko epean joan-etorriko bidaiak egiten badituzte.

Bi deskontu mota horiek batera aplika daitezke, baldin eta teleordainketako gailua erabiltzen bada, betiere araudian aurreikusitako baldintzak beteta.

Azkenik, 2012ko azaroaren 14ko 8/2012 Foru Arauaren bidez, deskontu plana hobetzeko asmoz hileko gehieneko gastu muga bat ezarri zen, hori ere planari atxikitako erabiltzaileei aplikatzekoa.

Deskontuak, kenkari gehigarria eta aipatutako gehieneko gastu muga ezartzeko eskubidea izateko baldintzak araututa daude 2010eko ekainaren 15eko 4/2010 Foru Dekretu Arauaren 2. artikuluko bigarren atalean.

Deskontu horiek aplikatu diren urteetan, deskontu planari atxikitako erabiltzaileek egiten dituzten hainbat akats antzeman dira, zuzendu eta eragotzi behar direnak, kanonaren diru-bilketa eraginkorra izan dadin.

Batetik, deskontuak izateko baldintzak bete behar dira gailu telematikoa erabiltzen den aldi guztian, eta ez soilik eskatzen den unean bakarrik, indarrean dagoen araudiak aurreikusten duen moduan.

Era berean, identifikazioko eta ordainketako gailu telematikoaren erabiltzaile bakoitzak gailu hori ibilgailu bakarrerako erabili beharko du eta, gainera, ibilgailu horren jabea izan beharko du, pertsona batek deskontu eta kenkariak pila ez ditzan hainbat ibilgailu erabiltzeagatik.

Bestalde, deskontu planaren onurak dituen ibilgailuak soilik erabilera partikularra izan beharko du, irabazi asmorik gabekoa; beraz, ordainketa gailua duen ibilgailua ezingo da erabili jarduera profesional, enpresarial edo ekonomiko baterako.

Azkenik, deskontu planaren onurak izan ahal izateko betebeharrak dira zirkulazio baimena indarrean edukitzea, kanonaren ordainketa egunean izatea eta TAG gailu telematikoaren erabileraren inguruan Bidegi, S.A.k eskatzen dituen gainerako beharkizunak betetzea.

Horrenbestez, 2010eko ekainaren 15eko 4/2010 Foru Dekretu Arauaren 2. artikulua aldatu behar da, arau horretan aurreikusten diren deskontuak aplikatzeko eskubidea izateko bete behar diren beharkizun eta baldintzei dagokienez.

Artikulu bakarra. Aldatzea 2010eko ekainaren 15eko 4/2010 Foru Dekretu Araua, AP-1 eta AP-8 autobideak Gipuzkoako zatian 2010eko uztailaren 1etik aurrera erabiltzeko kanonak ezartzekoa.

2010eko ekainaren 15eko 4/2010 Foru Dekretu Araua modu honetan aldatzen da:

Bat.– Honela geratzen da idatzita 2. artikuluaren 2. apartatua:

«2. Foru Dekretu Arauan aurreikusitako deskontuak aplikatzeko eskubidea izateko, AP-8 eta AP-1 autobideetako erabiltzaileek ondorengo baldintzak bete beharko dituzte:

a) Jarduera profesional, enpresarial edo ekonomiko batera atxikia ez dagoen ibilgailu arin baten ohiko erabiltzailea eta jabedun den pertsona fisikoa izatea.

b) Deskontu planari atxikitzeko eskubidea ematen duen teleordainketako (TAG) gailu bat edukitzea. Gailu hori pertsonala eta besterenezina izango da.

c) Teleordainketako (TAG) gailua ibilgailu arin bakarrari lotuta egotea eta ibilgailu horren gida baimena indarrean izatea.

d) Xede horretarako gaitutako ordainketa bitarteko baten edo bankuko kontu baten titularra izatea.

e) Gipuzkoako udalerriren batean erroldatuta egotea.

f) Gipuzkoako Foru Ogasunarekin zerga betebeharretan egunean egotea.

g) Bidegi Gipuzkoako Azpiegituren Agentziaren azpiegiturak erabiltzeko kanonaren ordainketan egunean egotea, eta teleordainketako (TAG) gailua erabiltzeko ezartzen diren gainerako betebeharrak betetzea.

Era berean, deskontua duen gailu telematikoa emango zaie gipuzkoar egoiliarrak diren eta goian aipatutako baldintza guztiak betetzen dituzten pertsonei, ibilgailurik jabetzan ez eduki arren, ibilgailu arin baten ohiko erabiltzaileak direla egiaztatzen badute.»

Bi.– 2. artikuluari eduki hau duen 3. zenbakia eransten zaio:

«3. Baldintza horiek bete beharko dira deskontu aldiak irauten duen denbora guztian. Horrela egin ezean, deskontuak, kenkari gehigarria eta hileko gehieneko gastu muga ezartzeko eskubidea galduko da eta, ondorioz, baliogabetu egingo dira baldintzak bete ez dituen aldian sortu dituen eta aplikatu gabe dauden deskontu eta kenkari gehigarri guztiak. Halaber, denboraldi horretan egin diren deskontuak eta kenkariak itzuli beharko dira.»

AMAIERAKO XEDAPENA

Foru arau hau 2015eko urtarrilaren 1ean jarriko da indarrean.

Azterketa dokumentala